Stoli i Partizanit është një nga çështjet më të rëndë sishme të momentit në Superiore.
Pavarësisht se skuadra po ecën mirë dhe po fiton ndeshje pas ndeshjeje, në klub po kërkojnë për një “timonier” të ekipit, të cilit do t’i besohet në një plan afatgjatë me objektiv titullin dhe grupet e Ligës së Konferencës. Ndonëse kanë kaluar javë tashmë që nga largimi i Zekiçit, të kuqtë nuk e kanë emëruar një trajner, por kjo nuk do të thotë se nuk kanë punuar për të sjellë një emër të përshtatshëm për klubin dhe skuadrën që është Partizani.
OBJEKTIVI NUMËR 1 – Synimi kryesor i kampionëve vijon të jetë Orges Shehi. Siç edhe “Panorama Sport” e ka pasqyruar në ditët e shkuara, mes durrsakut dhe Partizanit ka një marrëveshje paraprake, por asgjë të shkruar apo të folur mes palëve në mënyrë përfundimtare. Kontrata aktive me Tiranën i bën të dyja palët të jenë disi të tërhequra, me trajnerin, që është përqendruar më së shumti në zgjidhjen e konfliktit ligjor. Ky detaj ka shtyrë edhe që palët të mos kenë kontakte konkrete në lidhje me projektin dhe aspektin financiar.
ALTERNATIVAT – Nëse Prosineçki është një opsion i ditur tashmë, “Panorama Sport” ka mësuar një tjetër trajner, që është alternativë e Shehit dhe me të cilin Partizani ka pasur kontakte për të parë gatishmërinë e tij për pjesëmarrjen në projektin e të kuqve. Ai është Roberto Bordin, një emër mjaft i njohur në Itali si futbollist, më së shumti te Napoli. Edhe si trajner ka treguar një nivel të kënaqshëm, ku karrierën e ka kaluar më së shumti në Moldavi me Sherif Tiraspolin në periudhat 2016- 2018 dhe në janar-tetor të këtij viti. Bordin ka drejtuar në të shkuarën edhe kombëtaren e Moldavisë dhe Nefçin e Bakunë në Azerbajxhan. Pas ndarjes me Sherifin, Partizani e ka pikasur 58-vjeçarin dhe e sheh si opsion potencial. I vetmi detaj që e disavantazhon me Shehin është njohja e futbollit tonë. Bordin është lidhur edhe në të shkuarën për një kalim te Partizani.
KUR VENDOSET – Limiti që kanë vendosur te Partizani për emërimin e trajnerit është grumbullimi i Kombëtares. Qëllimi është që trajneri i ri të ketë mbi një javë kohë për tu njohur me skuadrën. Shehi mbetet në “pole position”.
