Presidenti amerikan Donald Trump është larguar nga Malajzia, duke përmbyllur fazën e parë të turneut të tij diplomatik në Azi. Ai pritet të mbërrijë në Japoni, ku të martën (28 tetor) do të takohet me kryeministren e parë femër të vendit, Sanae Takaichi, si dhe me perandorin e Japonisë.
Gjatë qëndrimit në Malajzi, Trump mori pjesë në nënshkrimin e një deklarate paqeje mes Tajlandës dhe Kamboxhias, një zhvillim që ai e përshkroi si “historik”. Po ashtu, negociatorët tregtarë amerikanë arritën kuadrin e një marrëveshjeje tregtare me Kinën, një hap që synon të zbusë tensionet përpara takimit të planifikuar të Trump me presidentin kinez Xi Jinping këtë javë.
Ndërkohë, në Uashington, mbyllja e qeverisë federale po zgjatet, dhe disa ligjvënës kanë shprehur shqetësim për zgjerimin e operacioneve ushtarake të administratës Trump kundër rrjeteve të dyshuara të trafikut të drogës në Karaibe.
Përpara nisjes nga Kuala Lumpur, presidenti përdori rrjetin e tij social Truth Social për të vlerësuar rezultatet e vizitës.
“Sapo po largohem nga Malajzia, një vend i shkëlqyer dhe shumë i gjallë. Nënshkruam marrëveshje të mëdha tregtare dhe të tokës së rrallë, dhe dje, më e rëndësishmja, nënshkrova Traktatin e Paqes midis Tajlandës dhe Kamboxhias. JO LUFTË! Miliona jetë të shpëtuara. Çfarë nderi që e arritëm këtë. Tani, shkojmë në Japoni!!!”, shkroi Trump.
Trump do të qëndrojë në Japoni për pjesën e dytë të turneut gjashtëditor në Azi, ku pritet të zhvillojë bisedime mbi sigurinë rajonale dhe bashkëpunimin ekonomik.
