Një sasi prej 46 kilogramësh lëndë narkotike, e dyshuar si Cannabis sativa, është sekuestruar në Aeroportin Ndërkombëtar të Rinasit gjatë kontrolleve të ushtruara mbi bagazhet e pasagjerëve.
Sipas njoftimit zyrtar, droga u zbulua gjatë skanimit të valixheve të një fluturimi me itinerar Toronto–Rinas, ku dy bagazhe ngjallën dyshime për përmbajtje të kundërligjshme.
Pas kontrollit fizik, të kryer në prani të poseduesve të bagazheve, autoritetet gjetën dhe sekuestruan 46 kilogramë kanabis, të ndarë në 89 paketime.
Dy poseduesit e valixheve janë arrestuar, ndërsa identiteti i tyre nuk është bërë ende publik nga autoritetet.
Lënda narkotike dhe të arrestuarit iu dorëzuan strukturave të Policisë së Shtetit, të cilat kanë nisur hetimet për të zbardhur plotësisht rrethanat e rastit dhe për të identifikuar persona të tjerë të mundshëm të përfshirë në këtë aktivitet kriminal.
