Rrjeti ndërkombëtar SafeJournalists ka kritikuar disa dispozita të Rregullores së re të Brendshme të Gjykatës së Posaçme kundër Korrupsionit dhe Krimit të Organizuar për mediat, e cila pritet të hyjë në fuqi më 1 shtator.
Sipas organizatës që mbron lirinë e medias në rajon, disa prej rregullave të reja mund të ndikojnë në mënyrën se si gazetarët ndjekin dhe raportojnë proceset gjyqësore me interes publik.
“Efekti i kombinuar i disa dispozitave rrezikon të kufizojë aftësinë e gazetarëve për të ndjekur drejtpërdrejt proceset gjyqësore, për të mbajtur shënime të sakta, për të komunikuar me redaksitë e tyre dhe për të raportuar në kohë për çështje me interes të jashtëzakonshëm publik”, thuhet në reagimin e SafeJournalists.
Sipas rrjetit, problematike paraqiten veçanërisht dispozitat që lidhen me akreditimin e gazetarëve, përdorimin e pajisjeve elektronike në sallën e gjyqit dhe procedurat për ndjekjen e seancave.
“Neni 90 vendos akreditim vjetor dhe individual, ndërsa neni 93(1) rregullon aksesin e përfaqësuesve të akredituar të medias. Rregullorja nuk përcakton qartë nëse një gazetar pa akreditim të përhershëm nga Gjykata e Posaçme mund të ndjekë një seancë, e cila përndryshe është publike, si anëtar i publikut”, thekson organizata.
Një tjetër pikë e kontestuar nga SafeJournalists është ndalimi i mbajtjes dhe përdorimit të telefonave celularë, laptopëve dhe pajisjeve të tjera elektronike në sallën e gjyqit.
“Neni 76 dhe neni 93(16) ndalojnë gazetarët e lejuar vetëm për të ndjekur një seancë që të mbajnë ose përdorin telefona celularë, laptopë dhe pajisje të tjera elektronike”, thuhet në deklaratë.
“Një ndalim i përgjithshëm pengon gjithashtu mbajtjen në heshtje të shënimeve, raportimin me shkrim, komunikimin me redaktorët, verifikimin e informacionit ligjor dhe përdorimin e pajisjeve për nevoja aksesueshmërie”, deklaron SafeJournalists.
Organizata kundërshton edhe detyrimin që gazetarët të paraqesin kërkesë 24 orë përpara seancave në raste të caktuara, pasi sipas saj, kjo procedurë mund të krijojë pengesa për raportimin e ngjarjeve urgjente dhe për mediat e vogla.
“Seancat urgjente, njoftimet e vona dhe zëvendësimi i gazetarëve kërkojnë një procedurë të thjeshtë dhe të shpejtë”, thuhet në reagim.
SafeJournalists i ka kërkuar GJKKO-së të rishikojë dispozitat që lidhen me median dhe të konsultohet me gazetarët, organizatat mediatike dhe ekspertët ligjorë.
