Protestat e fermerëve grekë kanë hyrë në fazën më të tensionuar të tyre, duke u shndërruar në një krizë kombëtare që ka paralizuar vendin dhe ka ngritur shqetësime serioze për furnizimet dhe lëvizjen e mallrave.
Me mijëra fermerë prej më shumë se 1 muaji kanë zbritur në rrugë me traktorë dhe mjete bujqësore, duke bllokuar rrugët kryesore të transportit, qytetet si dhe aeroportet, ndërsa nuk kanë munguar dhe përleshjet me policinë.
Por për çfarë protestojnë fermerët greke? Ja disa nga çështjet kryesore
1.Vonesat e subvencioneve dhe kompensimeve
Fermerët pretendojnë se qeveria nuk u ka disbursuar në kohë subvencionet bujqësore, si edhe kompensimet për dëmet nga përmbytjet, stuhitë, sëmundjet e bagëtive dhe problemet strukturore në bujqësi.
Sipas tyre, shumë pagesa të premtuara sipas programeve bujqësore dhe skemave të mbrojtjes mbeten të pezulluara ose të paplotësuara.
2.Kostot e larta të prodhimit
Nafta bujqësore, energjia elektrike, farërat, plehrat kimike dhe shërbimet e mekanizimit sipas tyre janë rritur ndjeshëm, duke e bërë të paqëndrueshëm prodhimin. Fermerët thonë se çmimet e tregut janë shumë më të ulëta se kostoja e prodhimit, gjë që i çon drejt humbjes financiare.
3.Mungesa e reformave në sistemin e kompensimeve
Fermerët pretendojnë se modeli aktual i sigurimeve bujqësore nuk mbulon si duhet dëmet nga moti ekstrem, thatësirat, përmbytjet apo sëmundjet te kafshët. Fermerët kërkojnë një sistem më transparent dhe më efikas, i cili të garantojë dëmshpërblime reale dhe në kohë.
4.Presioni i konkurrencës nga importet
Ata denoncojnë edhe importet e produkteve më të lira nga vendet e tjera të BE-së dhe Ballkanit, të cilat, sipas tyre, po dëmtojnë çmimet e tregut dhe po shkatërrojnë prodhimin vendas.
Këto janë disa nga pikat për të cilët fermerët grekë janë ngritur në protestë pasi sipas tyre, pavarësisht se qeveria greke ka premtuar pagesa të shpejta të subvencioneve të prapambetura, paketa mbështetëse për zonat e prekura nga fatkeqësitë natyrore si dhe lehtësime fiskale asnjëra nga ato nuk është përmbushur. Ata e akuzojnë qeverinë për mungesë transparence dhe vonesa të qëllimshme, ndërsa janë shprehur të vendosur për të mos u tërhequr pa marrë garanci të shkruara.
Si janë përshkallëzuar protestat deri më tani?
Fillimisht protestat nisën me tubime pranë komunave bujqësore, ku fermerët kërkuan dialog me autoritetet lokale dhe ministrinë e bujqësisë. Por duke mos marrë asnjë reagim nga këta të fundit, mijëra traktorë u vendosën në rrugët kryesore, duke bllokuar autostrada strategjike, si Autostradat që lidhin Athinën me Selanikun, Rrugët e Thesalisë, aksi Kakavijë-Janinë dhe Lidhjet kryesore drejt Maqedonisë dhe Epirit.
Këto bllokada shkaktuan ngadalësim masiv të qarkullimit dhe ndërprerjen e transportit të mallrave.
Fermerët zgjeruan më tej protestat duke bllokuar, Pikat kufitare me Bullgarinë dhe Maqedoninë e Veriut si dhe disa porte të rëndësishme, ku janë ndaluar kamionë dhe tragete me mallra bujqësore.
Ndërkohë, ditën e sotme fermerët kanë tentuar të bllokojnë edhe aeroportet. Protestuesit tentuan të afrohen drejt aeroporteve kryesore për të krijuar presion maksimal ndaj qeverisë. Për pasojë, pati ndërhyrje të forcave të policisë me gaz lotsjellës dhe përplasje të izoluara.
Sipas mediave greke, lëvizja është shtrirë në të gjithë Greqinë dhe fermerët thonë se do të vazhdojnë bllokadat derisa të jenë marrë garanci reale dhe të shkruara për pagesat, kompensimet dhe uljen e kostove të prodhimit.
Pavarësisht se qeveria greke ka kërkuar dialog, dhe ka paralajmëruar se bllokimi i vendeve strategjike nuk do të tolerohet, fermerët refuzojnë të tërhiqen pa marrë garanci konkrete.
