Në kushtet kur qytetarët shqiptarë paguajnë ndër çmimet më të larta të karburanteve në botë, qeveria vazhdon të rrisë ngarkesën fiskale mbi këtë produkt.
Përmes një vendimi të miratuar në mbledhjen e fundit, Këshilli i Ministrave ka rikthyer konçesionin famëkeq të markimit të karburanteve, ndonëse këtë herë përmes shoqërisë publiko-private ALBTrace Co dhe me një tjetër emër.
Vendimi detyron kompanitë e naftës të shënjojnë çdo litër naftë që prodhojnë apo hedhin në treg, përmes një shënjuesi që është monopol ekskluziv i shoqërisë ALBTrace.co.
Për këtë shërbim kompanitë do të paguajnë një tarifë 6.5 euro për çdo 1 mijë litra karburant të tregtuar ose prodhuar, kosto të cilën më pas do ja u përcjellin qytetarëve në çmimin fundor të naftës.
“Tarifa kombëtare e shërbimit të shënjimit, që do t’i paguhet shoqërisë “ALBTrace CO”, sh.a., nga subjektet e detyruara dhe do të jetë në shumën prej 6.5 (gjashtë pikë pesë) euro pa TVSH, për 1 000 (një mijë) litra të shënjuara,” thuhet në vendimin e qeverisë, që është propozuar nga ministri i Financave, Petrit Malaj.
Një akt ligjor, i cili vendos një tarifë të detyrueshmë në monedhë të huaj dhe jo në lek është një marrëzi më vete. Aq më tepër kur ky akt propozohet nga ministri i Financave dhe miratohet nga Këshilli i Ministrave. Por ky është problemi më i vogël.
Shënjimi do të rrisë më tej barrën fiskale dhe për rrjedhim edhe çmimin që qytetarët shqiptarë paguajnë për karburantet për të çuar fitime tek privati. ALBTrace.co është një shoqëri e përbashkët publiko private. Shteti zotëron 51 për qind të aksioneve të kësaj shoqërie, ndërkohë që 49 për qind zotërohen nga O & S SECURITY AND SOLUTIONS.
Kjo e fundit është një kompani private nga Emiratet e Bashkuara Arabe, e cila zotërohet nga Banka Qendrore e Emirateve dhe zvicerianja Sicpa, ish koncesionari i pullave fiskale.
Ky është praktikisht rikthim i konçesionit të markimit nga dera e pasme dhe me aktorë të tjerë. Kryeministri Edi Rama ka deklaruar publikisht se shërbimi i shënjimit do të bëhet me qëllim për të luftuar kontrabandën dhe evazionin në sektorin e naftës, një proçes që dështoi me konçesionin e mëparshëm të markimit, i cili nuk solli asnjë përmirësim në mbledhjen e akcizës. Por sipas Ramës, ky konçesion do të jetë më i mirë se sa ai i dhënë nga qeveria e kaluar./kapitali.al
