Regjisori Saimir Kumbaro, i është drejtuar kryeministrit Edi Rama me një letër të hapur, në të cilën e kritikon për mënyrën se si po përballon protestat e të rinjve dhe i kërkon të largohet nga detyra.
Në mesazhin e tij, Kumbaro ngre shqetësimin për mungesën e perspektivës që, sipas tij, po përjeton rinia shqiptare, ndërsa akuzon kreun e qeverisë se po u përgjigjet kërkesave të saj me dhunë dhe përbuzje.
“25 vjet më parë u premtove shqiptarëve një jetë me dinjitet. Sot, pas 25 vitesh, e vë rininë përballë dhunës. Të rinjtë e këtij vendi kërkojnë një arsye për të mos ikur, dhe ti u përgjigjesh me dhunë”, shkruan regjisori në letrën drejtuar Ramës.
Kritika për krahasimin me Francën
Një pjesë të rëndësishme të reagimit të tij, Saimir Kumbaro ia kushton krahasimit që kryeministri ka bërë mes protestave të të rinjve shqiptarë dhe atyre në Francë.
Regjisori e cilëson këtë krahasim fyes, duke argumentuar se protestat në Shqipëri burojnë nga probleme më të thella sesa pakënaqësitë për shërbimet në shkolla.
“Studentët shqiptarë protestojnë sepse nuk kanë shpresë. Ata nuk janë të pakënaqur me një shërbim, por me një vend që nuk u ofron të ardhme”, shprehet Kumbaro.
Sipas tij, pakënaqësia e të rinjve shqiptarë lidhet me mungesën e besimit se mund të ndërtojnë një të ardhme në vendin e tyre. Ai i kërkon kryeministrit të kuptojë arsyet që i kanë nxjerrë ata në rrugë, në vend që t’i krahasojë me protestuesit në vende të tjera.
Kërkesa e drejtpërdrejtë për Ramën
Në vijim të letrës, regjisori thekson se përgjegjësia e një shteti duket edhe në mënyrën se si trajton të rinjtë kur ata kundërshtojnë pushtetin.
Kumbaro akuzon kryeministrin se po i trajton protestuesit me dhunë dhe përbuzje, ndërsa e bën përgjegjës për situatën e krijuar.
Në përfundim, ai i drejtohet Ramës me një kërkesë të prerë për dorëheqje.
“JEP DORËHEQJEN! Jep dorëheqjen, sepse je përgjegjës për gjithçka që po ndodh”, shkruan Saimir Kumbaro në letrën e tij të hapur.
Reagimi i regjisorit vjen në një moment kur protestat e të rinjve dhe qëndrimi i qeverisë ndaj tyre kanë nxitur debate publike, ndërsa kritikat ndaj kryeministrit po shprehen edhe përmes deklaratave dhe reagimeve në rrjetet sociale.
