Kryeministri Edi Rama ka ashpërsuar gjuhën ndaj protestuesve që prej ditësh kërkojnë largimin e tij nga pushteti, duke i etiketuar ata si njerëz të manipuluar, me “mendje të cekëta” dhe pjesëmarrës në një “revolucion imagjinar”.
Në një reagim të gjatë në ‘X’, Rama jo vetëm që hodhi poshtë pretendimet e protestuesve, por i akuzoi ata se po dëmtojnë imazhin e Shqipërisë, po godasin turizmin dhe po krijojnë pasiguri për investitorët e huaj. Ai foli për “mendje të liga” dhe “duar të këqija” që, sipas tij, kanë marrë nën kontroll protestën.
Më i ashpër kryeministri u tregua ndaj të rinjve që iu bashkuan marshimit drejt Rinasit, për të cilët tha se e kuptuan vetë “çfarë budallallëku kishin bërë” duke ndjekur, sipas tij, persona të infiltruar nga forca destruktive.
Rama rezervoi sulme edhe për figurat publike që kanë mbështetur protestën, duke deklaruar se ato janë bashkuar me idenë se “deti u bë kos” dhe se qeveria po rrëzohet. Sipas tij, këta personazhe po ushqehen nga iluzioni se ka ardhur momenti i tyre politik.
Pavarësisht toneve fyese ndaj pjesëmarrësve në protestë, kryeministri u shpreh i bindur se në fund përfituesit e vetëm do të jenë qeveria dhe Partia Socialiste, e cila sipas tij do të dalë më e fortë politikisht pas përfundimit të kësaj vale protestash.
POSTIMI I PLOTE
Protestuesit janë të lirë të protestojnë paqësisht për çfarë të duan, si të duan e deri kur të duan, por pa dashur t’ju bëj moral nuk kam se si mos t’u them:
1. Kjo protestë nuk ka më asnjë lidhje me Sazanin a me Zvërnecin, sepse i gjithë dokumentacioni i procesit dhe e gjithë qasja e dokumentuar qeverisë, tregojnë qartë që qeveria është në lartësinë e interesit publik e të standarteve dhe praktikave më të mira ndërkombëtare.
2. Kjo protestë po godet imazhin e Shqipërisë dhe sezonin turistik, duke ushqyer perceptimin negativ e të pavërtetë të një vendi jomiqësor ndaj mjedisit, jomikpritës për investimet e huaja dhe te pasigurtë për turistët. Anullimet e rezervimeve të hoteleve dhe bllokimet e rrugëve paralajmërojnë një sezon jo pozitiv ekonomikisht, për shumë e shumë familje e njerëz që kanë lidhje direkte apo indirekte me zinxhirin e vlerës së industrisë së turizmit.
3. Kjo protestë që arrin e degradon në një turmë të drejtuar nga mendje të liga dhe duar të këqia drejt rrugës së aeroportit, duke bllokuar natën në rrugë mijëra njerëz në lëvizjen e tyre të lirë, ka brenda saj pikërisht atë të keqen e madhe të ekstremizmit që frymëzon bullizimin online dhe prishjen me pahir të ritmit të jetës së shumicës.
4. Keqardhje për të rejat e të rinjtë e zhgënjyer nga marshimi qorrazi drejt Rinasit me shijen e lirisë e të pavarësisë së tyre dhe në emër të një revolucioni imagjinar, derisa e kuptuan edhe vetë se çfarë budallallëku kishin bërë duke i shkuar mbrapa skuthave të infiltruar nga forcat destruktive, brenda a jashtë, të cilat po bëjnë çmos për ta dëmtuar sa më shumë Shqipërinë. Uroj që të zgjohen sa më parë nga ky jerm dhe të shkëputen një orë e më parë nga mendjet e liga dhe duart e këqia që tanimë e kanë marrë në kontroll protestën.
5. Kjo protestë ka ekzaltuar edhe shumë personazhe me një emër të dëgjuar në mexhelisin e jetës publike. Me mendjet e tyre të cekëta ata i janë bashkuar asaj me mënyra të ndryshme, në bulevard apo në kanalet sociale e mediatike, me idenë se deti u bë kos, qeveria po mbytet, një orë e re erdhi për lugët në brezat e tyre.
Por nëse ka përfitues të vërtetë nga kjo protestë, ata janë vetëm dy:
Qeveria Shqiptare, e cila do të nxjerrë patjetër mësimet që i duhen nga pjesa e çiltër e protestës, duke adresuar si duhet shqetësimet legjitime të asaj pjese dhe Partia Socialiste, e cila kur të shpërndahet mjegulla do t’i zhgënjejë rëndë të gjithë kundërshtarët e saj, duke u shfaqur më e madhe dhe më e fortë në qendër të skenës politike të Shqipërisë????????
