Kryeministri Edi Rama ka paralajmëruar se asnjë deputet socialist që ka marrë të paktën një mandat nga PS nuk do të jetë pjesë e listës së mbyllur, në zgjedhjet parlamentare të 11 majit.
Rama e bëri të qartë se cilido që ka kundërshtime, duhet të njoftojë paraprakisht drejtuesin ose drejtuesen politike të qarkut.
“Asnjë deputet në gjininë mashkullore që ka marrë qoftë edhe një mandate nga PS nuk do të jetë në listën e mbyllur, është e drejta e kujto që nuk dëshiron të jetë në listën e hapur që të na thotë, por të na e thotë përpara që më vonë të mos na thotë nuk shkoj. Cilido dhe cilado prej jush që nuk pranon të jetë në listën e hapur, duhet t’ia bëj me dije drejtuesit apo drejtueses politik”, deklaroi Rama para grupit të PS.
Edhe pse është thënë që do të kandidojë në Tiranë, vetë Rama e ka mohuar, madje është shprehur se mund të mos jetë në listat e zgjedhjeve të PS.
“E njëjta gjë vlen në rastin tim. Me thënë të drejtën as e kam pasur, as e kam idenë pse unë duhet të jem aty në atë Parlament për sa kohë e kam këtë detyrë dhe nga ana tjetër do ishte një hyrje në hak ndaj të tjerëve që të vendosej emri im dhe pastaj të vinin votat dhe të çorientoheshin njerëzit. Kështu që kush është në listën e hapur duhet të jetë në një garë shumë të barabartë. Ndërkohë vendimin për veten time nuk e kam akoma të marrë plotësisht, se mund edhe të mos jem fare në listë duke qenë deputet i të gjithëve për detyrën që kam dhe për të mos i zënë vendin askujt. Kjo është pak a shumë pamja sot”, tha Rama.
