Një skemë mashtruese e rrezikshme ka shpërthyer ditët e fundit në Shqipëri, ku qindra qytetarë janë përballur me zhvatje të hapur të llogarive të tyre bankare, përmes një SMS-je që pretendon të jetë nga Raiffeisen Bank. Por më skandalozja? Vetë banka ka zgjedhur të heshtë!
Skema: Një link fatal nga “Raiffeisen”
Qytetarët kanë marrë një SMS ku u kërkohet të përditësojnë të dhënat e tyre përmes një linku. Kush ka klikuar – veçanërisht ata që kanë të instaluar aplikacionin “Raiffeisen ON” – ka pësuar zhdukje të parave nga llogaria e vet! Hakerët kanë përdorur një metodë klasike phishing, por me efekte reale në xhepin e shqiptarëve.
Banka: Heshtje. Policia: Kujdes!
Ndërsa dëmet shtohen dhe paniku përhapet, Raiffeisen Bank nuk ka dalë me asnjë paralajmërim zyrtar, duke i lënë qytetarët të informohen vetëm nga denoncimet në rrjete sociale dhe media.
Vetëm Policia e Shtetit ka reaguar, duke paralajmëruar qytetarët që të mos klikojnë asnjë link të dërguar me SMS dhe duke theksuar se bankat serioze nuk kërkojnë të dhëna përmes mesazheve të tilla.
Pse hesht Raiffeisen?
A është kjo papërgjegjshmëri totale, apo një përpjekje për të fshehur përmasat e dëmëve? Një bankë e nivelit ndërkombëtar, me mijëra klientë në Shqipëri, zgjedh të mos japë asnjë paralajmërim, sqarim apo plan masash për mbrojtjen e klientëve.
Qytetarët kanë të drejtë të dinë:
Sa është numri i rasteve të konfirmuara?
Çfarë masash po merren për të ndaluar mashtrimin?
A do të kompensohen qytetarët e dëmtuar?
Reagimi i policisë
Drejtoria e Hetimit të Krimit Kibernetik në Policinë e Shtetit dëshiron të informojë opinionin publik lidhur me një skemë mashtruese që po qarkullon së fundi, përmes mesazheve SMS dhe aplikacioneve të komunikimit elektronik.
Shtetas ende të paidentifikuar po dërgojnë mesazhe që përmbajnë linke të rreme, me pretendimin se është i nevojshëm përditësimi i të dhënave bankare ose verifikimi i llogarisë së qytetarëve. Pasi qytetarët klikojnë mbi këto linke dhe japin të dhënat e tyre personale apo bankare, autorët e këtyre veprimeve arrijnë të aksesojnë llogaritë bankare dhe në shumë raste, kanë realizuar vjedhjen e shumave të konsiderueshme monetare.
Policia e Shtetit thekson se asnjë institucion bankar apo shtetëror nuk kërkon përmes SMS-ve apo linkeve të dyshimta dërgimin e të dhënave sensitive, si numrat e kartave bankare, kodet PIN apo kredencialet e tjera të sigurisë.
Për këtë arsye, iu bëjmë thirrje të gjithë qytetarëve:
Të mos klikojnë në asnjë link të dërguar nga burime të panjohura;
Të mos japin të dhënat e tyre personale apo bankare në forma të dyshimta online;
Të verifikojnë çdo informacion të tillë drejtpërdrejt me institucionin përkatës (bankë apo agjenci shtetërore);
Të raportojnë menjëherë çdo rast të dyshuar pranë strukturave të hetimit të krimit kibernetik në Policinë e Shtetit.
Policia e Shtetit vijon të ndjekë me prioritet këto raste dhe po bashkëpunon ngushtë me institucionet financiare dhe partnerët, për identifikimin dhe ndjekjen penale të autorëve.
Respektoni sigurinë tuaj digjitale!
Mos ndani të dhëna personale me burime të pasigurta!
