Deputeti i Partisë Socialiste, Ulsi Manja, i është përgjigjur kërkesave të protestuesve për dorëheqjen e kryeministrit Edi Rama, duke theksuar se kreu i qeverisë ka marrë një mandat të qartë nga qytetarët dhe nuk do të tërhiqet.
Përmes një postimi në rrjetet sociale, Manja shkruan se, përtej çdo debati politik, Rama ka një kontratë me 860 mijë shqiptarë, të rinovuar në zgjedhjet e 11 majit 2025, e cila zgjat deri në vitin 2029.
“Mllefi dhe helmi i askujt, aq më pak i dikujt që jeton larg Shqipërisë, nuk mund të derdhen padrejtësisht mbi vendin tonë. Shqipëria ka halle, por nuk i zgjidh duke mohuar çdo arritje dhe duke nxirë çdo të mirë që është bërë për të. Ne do të vazhdojmë të dëgjojmë çdo zë të arsyeshëm dhe të forcojmë dialogun me qytetarët, por pa u tërhequr as edhe një milimetër nga kontrata që rinovuam me shqiptarët në vitin 2025. Helmi dhe urrejtja nuk ndërtojnë as shtet, as të ardhme. Shqipërinë e ndërton puna!”, shkruan Manja.
Reagimi i deputetit socialist vjen vetëm pak orë pasi vetë kryeministri Edi Rama iu përgjigj thirrjeve për dorëheqje të drejtuesit të lëvizjes “Diaspora për Shqipërinë e Lirë”, Florian Haçkaj, dhe protestuesve që prej më shumë se katër javësh zhvillojnë demonstrata në Tiranë.
Rama deklaroi se nuk ka ndërmend të japë dorëheqjen, pasi mandatin e tij e konsideron një kontratë me qytetarët.
