Talenti i Dinamos është futur në “radarët” e Kategorisë së Parë.
Një nga mbrojtësit më premtues të të rinjve të Dinamos është drejt një transferimi në Kategorinë e Parë. Dy skuadra nga qytete me traditë në futbollin shqiptar kanë pikasur mbrojtësin e qendrës, i cili aktivizohet te të rinjtë e Dinamos, por edhe me ekipin e parë.
Bëhet fjalë për Leonel Qoshkun, 19-vjeçarin që konsiderohet si një nga mbrojtësit më premtues në qarkullim. Qoshku ka qenë më herët pjesë e Tiranës dhe në fillim të këtij sezoni iu bashkua dinamovitëve.
Aktualisht, 19-vjeçari aktivizohet me Dinamo City B, ku ka qenë një titullar i padiskutueshëm në formacionin e teknikut Kalari.
Burime pranë lojtarit bëjnë me dije se kanë nisur kontaktet e para nga dy klube të Kategorisë së Parë, të cilat janë të interesuara për të afruar në skuadër qendërmbrojtësin. Interesimi nuk është thjesht në fazë vëzhgimi, pasi kanë filluar edhe bisedimet për të kuptuar mundësinë e një transferimi të mundshëm.
Mbetet për t’u parë deri në fund të sezonit se cila ofertë do ta bindë më shumë qendërmbrojtësin Qoshku.
