Këshilli i Ministrave ka miratuar krijimin e Regjistrit Qendror të Pasurive të Paluajtshme, i njohur si Kadastra Fiskale, një bazë shtetërore të dhënash që do të përdoret për administrimin dhe llogaritjen e taksës mbi ndërtesën në të gjithë vendin.
Regjistri do të administrohet nga Drejtoria e Përgjithshme e Taksës së Pasurisë, në bashkëpunim me institucionet shtetërore dhe bashkitë.
Në të do të përfshihen të dhëna për ndërtesat, njësitë e banimit apo biznesit, pronarët dhe përdoruesit, zonat e vlerës, si dhe detyrimet dhe pagesat tatimore.
Sipas vendimit, bashkitë do të detyrohen ta përdorin Kadastrën Fiskale për administrimin e taksës mbi ndërtesën duke filluar nga 10 shkurti 2026.
Sistemi do të ndërveprojë edhe me bazat e tjera shtetërore të të dhënave, përfshirë Kadastrën, Gjendjen Civile, Tatimet dhe OSHEE-në.
