Pamjet e publikuara së fundmi tregojnë momentet kur Safet Bajri largohet pas vrasjes së Fatbardh Licit në Shkodër. Gazetarja Klodiana Lala bëri të ditur në emisionin “Në Shënjestër” se këto pamje janë përdorur nga SPAK si prova kyçe në procesin gjyqësor ndaj Safet Bajrit, Astmer Bilalit dhe Behar Bajrit.
Sipas Prokurorisë, të dyshuarit janë identifikuar si Personi 1 dhe Personi 2, përmes dhjetëra kamerave të sigurisë, që nga momenti i kryerjes së krimit e deri te gjetja e automjetit të djegur që u përdor në vrasje.
Makina e bardhë, e përdorur për kryerjen e krimit, rezulton të jetë siguruar nga partnerja e Safet Bajrit, e cila është arrestuar për përkrahje të autorit të krimit dhe sigurimin e kushteve për kryerjen e vrasjes.
Ngjarja e rëndë ka ndodhur në vitin 2018, ndërsa hetimet intensive dhe provat e grumbulluara nga SPAK kanë sjellë në dritë detaje të reja që mund të jenë vendimtare për procesin gjyqësor.
Autoritetet po vazhdojnë me hetimet për të zbardhur plotësisht këtë ngjarje dhe për të vënë drejtësinë në vend.
