Në Gjykatën Themelore në Prishtinë u mbajt sot seanca gjyqësore ndaj tre të akuzuarve për vrasjen e Liridona Ademajt, më 29 nëntor 2023.
Prokurorja Javorka Perlinçeviq deklaroi ndër të tjera se “Naim Murseli urdhëroi vrasjen e saj pasi Liridones i ishin siguruar 260 mijë euro nga sigurimi jetësor në Suedi”.
Prokuroria shtoi se si provë materiale është propozuar edhe raporti që e kanë pranuar sipas kërkesës së tyre nga organet e Suedisë, e që kanë vërtetuar se në emër të tani të ndjerës, në vitin 2022 është paguar polica e sigurimit jetësor në vlerë prej 3 milionë kruna suedeze- në kundërvlerë 260 mijë euro.
Avokatja e Naim Murselit, Teuta Zhinopotoku deklaroi se mbrojtja ka kërkuar që i pandehuri Naim Murseli të dërgohet për ekzaminim mendor, por deri më tani nuk ka pranuar asnjë përgjigje zyrtare nga gjykata, ndërsa ai është deklaruar i pafajshëm.
I pafajshëm është deklaruar edhe i akuzuari tjetër, Kushtrim Kokalla, ndërkaq në heshtje u mbrojt Granit Plava.
Në aktakuzën e Prokurorisë, thuhet se Murseli, Plava dhe Kokalla ishin dakorduar paraprakisht që vrasja të kryhej nga i akuzuari Plava me marrëveshje që Murseli t’ia paguante atij 30 mijë euro. Rasti Murseli ka ngjallur vëmendje të madhe publike për shkak të rrethanave të rënduara të krimit dhe zhvillimeve në procesin gjyqësor.
