Zëvendëskryeministrja e pezulluar Belinda Balluku ndodhet sot në GJKKO, ku po shqyrtohet masa e sigurisë që e ndalon të dalë jashtë vendit dhe e pezullon nga detyra si ministre e Infrastrukturës dhe Energjisë.
Ndërkohë, deputeti i opozitës Gazment Bardhi ka publikuar pjesë nga dosja e SPAK-ut, ku pretendohet se Balluku dhe ish-drejtori i ARRSH-së, Evis Berberi, kanë komunikuar për ndarjen e loteve të Unazës së Madhe të Tiranës tek kompani të caktuara paraprakisht.
Në bisedat e përgjuara, të publikuara nga Bardhi dy zyrtarët shfaqin shqetësim se si një portal online ka siguruar listën e kompanive, ndërsa Berberi shprehet se “çdo lot ka marrë kriteret e shtypura në letër, pa emër”, duke nënkuptuar se fituesit janë vendosur më herët.
Ndërkohë në doje përmendet edhe biznesmeni Ilir Shtufi. Balluku i shkruan Berberit: “Hajde tek une ne 11”, vijuar nga udhëzime për t’i bërë të qartë një operatori se “Punet i ke me gimin thuaj jo me mua”.
Menjëherë pas kësaj bisede, Evis Berberi komunikon me Ilir Shtufin, i cili i shkruan: “persh si ke kan.. ilir shufi nova jam. te tak pak mkan then kure mundesh”.
