Policia Kufitare ka arrestuar dy shtetas sirianë, të cilët akuzohen se kryenin veprimtarinë riminale të dhënies ndihmë për kalim të paligjshëm të kufirit, kundrejt pagesës.
Në kuadër të operacionit të koduar “Lugina 1” janë vënë në pranga shtetasit Tarek Abid Eshaq, 26 vjeç dhe Barud Hajali Ali, 25 vjeç, mbi të cilët rëndon akuza për veprën penale “Ndihma për kalim të paligjshëm të kufijve”, kryer në bashkëpunim.
Policia raporton se ata janë kapur gjatë natës në fshatin Kapshticë të Devollit, duke shoqëruar 8 shtetas egjiptianë dhe algjerianë (4 prej tyre të mitur). Sipas autoriteve, dy sirianët, ndihmonin emigrantë nga Vendet e Treta, që të kalonin ilegalisht kufirin jeshil me Greqinë, me qëllim kalimin në Mali të Zi dhe më pas në vendet e BE-së.
“Nga hetimet dyshohet se këta shtetas, në bashkëpunim me shtetas të tjerë sirianë, ndihmon emgrantë nga Vendet e Treta, kundrejt pagesës, që të kalonin ilegalisht në Shqipëri, nëpërmjet kufirit tokësor me Greqinë. Vijojnë hetimet për dokumentimin e plotë të kësaj veprimtarie kriminale, identifikimin dhe kapjen e shtetasve të tjerë të përfshirë.” – thuhet në njoftimin e Policisë.
Materialet procedurale i kanë kaluar Prokurorisë së Korçës për veprime të mëtejshme.
