Pedagogët janë mbledhur pranë Universitetit Politeknik të Tiranës, nga ku kanë nisur një marshim paqësor në mbështetje të studentëve, të cilët prej tetë ditësh vijojnë protestën.
Gjatë marshimit, pedagogët janë dëgjuar duke brohoritur thirrjen “Dorëheqje”, drejtuar kryeministrit Edi Rama.
Ata kanë bërë të ditur se qëndrimi i tyre është në mbështetje të studentëve dhe kërkesave të tyre. Gjithashtu, pedagogët synojnë të mblidhen çdo ditë në orën 10:00, për të shprehur solidaritetin me studentët që vijojnë protestën.
Bashkimi i pedagogëve vjen në një moment kur protestat në kryeqytet kanë hyrë në ditën e tetë, të shoqëruara me tensione dhe përplasje mes protestuesve dhe forcave të policisë.
