Kryeministri Edi Rama ka dalë në hyrje të godinës së Kryeministrisë, ku ka vendosur disa karrige, duke shprehur gatishmërinë për dialog me protestuesit, në ditën e tetë të protestës kundër qeverisë.
“ Kush do dialog pa kushte, ku të dojë, kur të dojë, edhe këtu po të dojë, unë jam në dispozicion bashkë me qeverinë”, deklaroi Rama.
Kreu i qeverisë theksoi se ftesa për dialog është e hapur për të gjithë ata që dëshirojnë të zhvillojnë një komunikim, ndërsa bëri të qartë se nuk përfshihen personat që, sipas tij, ushtrojnë dhunë dhe nuk distancohen prej saj.
“Vetëm ata që bëjnë dhunë dhe nuk distancohen nga dhuna nuk janë të mirëpritur”, u shpreh kryeministri.
Ky veprim vjen një ditë pas deklaratave të Ramës, i cili shprehu gatishmërinë për të dëgjuar palët që kërkojnë dialog, ndërsa protesta kundër qeverisë vijon prej tetë ditësh.
