Izraeli ka deklaruar se ka kryer një tjetër raund sulmesh ajrore, këtë herë ndaj pozicioneve të rebelëve Huthi në Jemen, duke shënjestruar objektiva ushtarake në kryeqytetin Sanaa dhe rajonin Al-Jawf. Sipas ushtrisë izraelite, sulmet ishin pjesë e përpjekjeve për të ndaluar kërcënimet ndaj sigurisë së shtetit hebre, ndërsa mediat e kontrolluara nga Houthi raportojnë për viktima, pa dhënë shifra të sakta.
Kjo ofensivë vjen vetëm një ditë pas një sulmi të diskutueshëm ajror në Doha, Katar, ku Izraeli pretendon se shënjestroi udhëheqës të lartë të Hamasit. Kryeministri izraelit Benjamin Netanyahu ka deklaruar se veprimi ishte “plotësisht i justifikuar”, pasi, sipas tij, personat e goditur ishin përgjegjës për organizimin e sulmit të përgjakshëm të 7 tetorit 2023 ndaj Izraelit.
Nga ana tjetër, autoritetet e Katarit kanë reaguar ashpër, duke e cilësuar sulmin si shkelje të rëndë të sovranitetit dhe ligjit ndërkombëtar dhe duke kërkuar që Izraeli të mbahet përgjegjës ndërkombëtarisht.
Ndërsa Hamasi konfirmon se sulmi në Doha vrau gjashtë persona, grupi mohon se ndonjë prej udhëheqësve të tij të jetë vrarë. Deri më tani, identitetet e viktimave nuk janë bërë publike.
