Partizani i këtij starti të sezonit mund të quhet edhe si një skuadër “ekstreme”, sepse ka arritur të fitojë plot katër ndeshje në limite, në kohën shtesë.
Të kuqtë kanë arritur të shënojnë 7 gola pas minutës së 76-të, çka i vë në sfidë edhe me emrat më të mëdhenj të futbollit europian. Sigurisht, ky është një krahasim vetëm statistikor, pasi dihet se nivelet dhe vështirësia janë të pamatshme. Siç shihet në tabelë, Barcelona, Shtutgarti, Arsenali, Interi dhe PSG-ja kryesojnë renditjet në 5 ligat kryesore sa i përket këtij treguesi, teksa “demat” arrijnë t’i lënë targën vetëm PSG-së. Parisienët kanë realizuar 5 herë, kundrejt 2 golave të pësuar.
NË SHTESË – Sa u përket golave në shtesë duhet thënë se Partizani renditet akoma më mirë në krahasimin me skuadrat më të mira për këtë tregues në 5 ligat kryesore. Të kuqtë kanë shënuar 4 gola në shtesë dhe ajo çka ka më shumë rëndësi, është fakti se të gjithë kanë qenë gola fitoreje. Në këtë aspekt e konkurron vetëm Arsenali, që ka shënuar po aq sa “demat”, por nuk ka pësuar, ndryshe nga Partizani, që numëron golin e pësuar në derbi.
