Gjykata e Elbasanit ka shpallur zyrtarisht falimentimin e kompanisë “Orti” sh.p.k., me seli në Elbasan, pas kërkesës së depozituar nga Raiffeisen Bank. Kompania rezulton të ketë lënë pas një zinxhir borxhesh të pashlyera që kapin vlerën e miliona eurove, duke fundosur banka, institucione publike dhe mbi 40 biznese private.
Raiffeisen Bank është kreditori më i dëmtuar në këtë proces. Sipas vendimit të gjykatës, “Orti” kishte marrë në vitin 2015 një kredi në vlerën prej 4 milionë eurosh, të cilën nuk e ka shlyer.
Menjëherë pas bankës, në listën e borxhlinjve renditet administrata tatimore, ndaj së cilës kompania ka detyrime të papaguara prej 2.3 milionë eurosh për tatim fitimi, TVSH dhe sigurime shoqërore.
Edhe Operatori i Shpërndarjes së Energjisë Elektrike rezulton ndër kreditorët, me rreth 500 mijë euro borxh për fatura të papaguara energjie, shkruan Kapitali.al.
Sipas raportit të paraqitur nga administratori i falimentit, kompania u ka borxh të paktën 40 bizneseve të tjera private, kryesisht furnitorë dhe nënkontraktorë. Përplasjet midis kreditorëve për të siguruar ekzekutimin e aseteve të mbetura janë shtuar, për shkak të urdhrave të shumtë përmbarimorë dhe mungesës së mjeteve të mjaftueshme për të mbuluar detyrimet.
Gjykata ka caktuar znj. Aida Nuri si administratore të procesit të falimentit dhe u ka dhënë kreditorëve një afat 45-ditor për të paraqitur zyrtarisht pretendimet e tyre.
E themeluar në vitin 2006 nga Kadri Mehallan, “Orti” sh.p.k. ka ushtruar aktivitet deri në vitin 2018, kur kaloi në status pasiv. Sot, ajo përfaqëson një nga rastet më të rënda të kolapsit financiar të një kompanie në Shqipëri, me një trashëgimi të madhe borxhesh dhe kreditorësh të pambuluar.
