Njëjtë si pjesa më e madhe e klubeve të Superiores, edhe Partizani ende nuk ka nisur të bëjë lëvizje konkrete dhe të ketë akorde të mbyllura në lidhje me merkaton.
Gjithsesi, në kampin e kuq qarkullojnë shumë emra dhe më i përfoluri mësohet të jetë Xhuliano Skuka. Dibrani e ka mbyllur bashkëpunimin me Mariborin dhe në ditët në vijim pritet të kthehet në stërvitje te Metzi në Francë, që ka në pronësi kartonin e tij. Pavarësisht kësaj, sulmuesi nuk pritet të qëndrojë në klubin francez, por me siguri do të huazohet sërish drejt një ekipi tjetër. Gazeta mëson se te Partizani janë të hapur për transferimin e Skukës dhe në ditët në vijim me siguri do të ketë lëvizje konkrete.
Partizani e kërkon me ngulm një lojtar të pastër goli dhe Skuka ka treguar se fanella e kuqe e ndez sa duhet dhe e shndërron në një “makineri” golash. Dibrani ishte frymëzimi i ekipit vjet në pjesën e parë të sezonit, duke shënuar 10 gola dhe i dhënë pikë plot vlera ekipit. Sakaq, dibrani luajti rol kryesor edhe në misionin për të kapur Kupat e Europës me Dritan Mehmetin në krye, në sezonin 2021- 2022. Pas një viti në Francë dhe në Slloveni, Skuka mund të kthehet sërish në shtëpinë e kuqe, aty ku edhe mundi të bëjë transferimin më të madh të futbollit shqiptar. Në janarin e kaluar ai u shit për plot 1.4 milionë euro te Metzi, me të cilin dibrani ka kontratë deri në verën e vitit 2026.
XHIXHA – Ka shanse që Partizani te tentojë të bashkojë dy lojtarët, që për disa muaj i dhanë tonin futbollit shqiptar, Skukën dhe Redon Xhixhën. Laçjani është pjesë e Karabakut në Azerbajxhan, ku e nisi sezonin shumë mirë në Europë, por në kampionat nuk ka arritur të gjejë hapësirat e duhura. Mediat azere shkruajnë se Partizani ka shfaqur interes për ish-sulmuesin e Tiranës, por për momentin gazeta mëson se nuk ka asgjë konkrete. Deri më tani të dyja palët e kanë mohuar një bashkëpunim të mundshëm. Por merkatoja ka treguar se asnjëherë nuk thuhet kurrë, me Orges Shehin, që duket si një shtysë e mundshme për ardhjen e 25-vjeçarit te Partizani. Xhixha ka kontratë me Karabakun deri në verën e vitit 2026, teksa rreth të kuqve prej ditësh përflitet emri i tij.
