Sipas të dhënave të deklaruara në formularët e pasurisë, gjatë vitit 2024 Beja ka përfituar pagesa nga disa institucione dhe borde njëkohësisht. Ai rezulton të ketë marrë të ardhura nga programe zhvillimi, organizata, qendra ligjore, institucione publike, si edhe nga borde apo këshilla drejtues në administratën shtetërore.
Në deklarimet e tij përmenden pagesa nga Agjencia Kombëtare e Financimit të Arsimit të Lartë, Agjencia Shtetërore e Kadastrës, Shkolla Shqiptare e Administratës Publike, KMCAP, Ministria e Arsimit, Agjencia e Administrimit të Pasurive të Sekuestruara dhe Konfiskuara, Ministria e Brendshme dhe Ministria e Financave.
Kjo përfshirje e gjerë në struktura të ndryshme shtetërore ngre pikëpyetje mbi mënyrën se si një zyrtar ka mundur të mbajë njëkohësisht kaq shumë angazhime të paguara dhe nëse këto pozicione kanë krijuar terren për konflikt interesi apo ndikim të tepruar në administratë.
Në të njëjtin vit, sipas deklarimeve, bashkëshortja e tij, Odeta Jahaj, ka raportuar gjithashtu të ardhura nga disa burime, përfshirë pagesa nga organizata ndërkombëtare dhe dhurata monetare në vlerën e 4 mijë eurove.
Një tjetër element që shton pikëpyetjet lidhet me aktivitetin privat të çiftit Beja. Në vitet 2015 dhe 2016, Besmir Beja dhe bashkëshortja e tij kanë qenë administratorë të shoqërisë “MODUS LEGAL SERVICES”, një kompani këshillimi ligjor dhe financiar. Sipas ekstraktit të QKB, objekti i aktivitetit përfshinte këshillim në të drejtën tregtare, taksa, prokurime publike, koncesione dhe privatizime.
Këto fusha janë veçanërisht sensitive, pasi lidhen drejtpërdrejt me marrëdhëniet mes administratës publike, biznesit dhe kontratave shtetërore.
Pas emërimit në krye të Doganës Shqiptare, ndaj Bejës janë ngritur pretendime për emërime preferenciale, shkarkime të diskutueshme, ndikim në tenderë dhe përpjekje për të kontrolluar strukturat kyçe të institucionit. Deri më tani, këto pretendime mbeten për t’u verifikuar nga institucionet kompetente.
Megjithatë, profili i tij i mëparshëm, me angazhime të shumta në borde, institucione dhe struktura këshillimore, e bën të domosdoshëm një kontroll më të thelluar mbi mënyrën se si është ushtruar ky aktivitet dhe nëse ka pasur përfitime të pajustifikuara apo konflikt interesi.
Doganat janë një nga institucionet më të rëndësishme financiare të shtetit shqiptar. Për këtë arsye, drejtimi i tyre kërkon jo vetëm aftësi administrative, por edhe transparencë të plotë mbi të kaluarën profesionale, lidhjet financiare dhe vendimmarrjet e drejtuesit të institucionit./GAZETAJONE
