Një bandë shqiptare e dyshuar për trafik ndërkombëtar kokaine është goditur në Belgjikë. Tetë persona u prangosën në kuadër të operacionit, prej të cilëve 4 janë lënë në arrest shtëpie. Mes të arrestuarve është edhe shqiptari Gerd Gjinarari, i njohur me nofkën “Gjenerali”.
Operacioni është zhvilluar pas një hetimi që kishte nisur rreth një vit më parë, kur policia belge mori informacion se në një apartament në Berchem, Antwerp, ruheshin sasi të mëdha kokaine.
Në fokus të hetuesve u vu një 48-vjeçar, i cili dyshohet se shërbente si “broker” ose ndërmjetës mes grupeve kriminale në Shqipëri dhe Amerikën Latine. Sipas autoriteteve belge, ai koordinonte grupet që merreshin me dërgimin, nxjerrjen nga porti dhe shpërndarjen e drogës.
48-vjeçari dyshohet gjithashtu se ofronte mënyra të ndryshme për trafikimin e kokainës, siguronte ndihmën e personave, përfshirë punonjës sigurie, dhe drejtonte grupet që merreshin me nxjerrjen e ngarkesave nga porti i Antwerp-it.
Hetimi kishte çuar më herët në sekuestrimin e dy ngarkesave me kokainë, përkatësisht 46 dhe 53 kilogramë.
Gjatë kontrolleve të zhvilluara në Antwerp, Berchem, Deurne, Kapellen dhe disa zona të Brukselit, policia gjeti armë dhe municione të fshehura, jelekë antiplumb, bllokues sinjali, para cash, makinë për numërimin e parave, pasaporta dhe karta shtypi të falsifikuara, si dhe presa dhe kallëpe për prodhimin e blloqeve të kokainës.
“Gjenerali” u arrestua edhe në qershor
Mes personave të përfshirë në hetim është edhe Gerd Gjinarari, 52 vjeç, i njohur si “Gjenerali”.
Gjinarari nuk është hera e parë që bie në prangat e autoriteteve belge këtë vit. Ai ishte arrestuar edhe në qershor, nga ekipi FAST i Policisë Federale, pasi ishte shpallur në kërkim ndërkombëtar nga Italia për një vrasje të vitit 1997.
Megjithatë, nuk dihet ende në çfarë rrethanash ai u lirua pas arrestimit të qershorit. Tashmë, disa muaj më vonë, Gjinarari është arrestuar sërish, këtë herë në kuadër të hetimit për trafikun ndërkombëtar të kokainës.
Sipas autoriteteve italiane, “Gjenerali” dyshohet se në vitin 1997 vrau një rival në një spital në Milano, duke përdorur një pistoletë të fshehur mes një buqete me lule. Pas arrestimit të parë në Belgjikë, procedura për ekstradimin e tij drejt Italisë ishte ende në zhvillim.
