Nga data 22 deri më 26 shtator, Shqipëria do të ketë mundësinë të përjetojë një udhëtim unik nëpërmjet artit, muzikës, vallëzimit dhe shijes kineze. Në kuadër të Javës Kukturore Kineze, Ambasada e Republikës Popullore të Kinës, me mbështetjen e Ministrisë së Turizmit, Kulturës dhe Sportit, sjell një program të pasur aktivitetesh në Tiranë dhe Elbasan, që synon të afrojë dy kulturat dhe të krijojë mundësi për shkëmbim dhe mirëkuptim mes popujve.
Në datat 22–25 shtator, Galeria FAB në Tiranë do të hapë dyert për ekspozitën “Close as Distant Horizons”, ku dy artistët e njohur kinezë, Wu Jun dhe Lin Zhaoyang, do të prezantojnë rreth 40 vepra të veçanta që pasqyrojnë ndërthurjen e estetikës tradicionale kineze me elemente bashkëkohore. Kjo është një mundësi e shkëlqyer për të eksploruar simbolikën dhe historinë që fshihet pas kompozimeve të tyre, të cilat reflektojnë mbi kuptimin e jetës dhe dimensionet e ekzistencës. Ekspozita do të jetë e hapur për publikun në oraret 10:00–13:00 dhe 18:00–21:00.
Një tjetër ngjarje e veçantë e kësaj jave do të jetë koncerti “Melodies Along the Silk Road” më 23 shtator, në Teatrin “Skampa” në Elbasan, ku publiku do të ketë mundësinë të shijojë meloditë tradicionale dhe moderne kineze, të cilat janë frymëzuar nga poezia klasike dhe simbolet natyrore. Ky koncert, i cili do të shoqërohet me performanca të veçanta nga Ansambli Kombëtar Shqiptar, do të jetë një urë e vërtetë mes dy kulturave dhe një mundësi për të eksploruar diversitetin e muzikës kineze.
Në datën 24 shtator, në Universitetin e Arteve në Tiranë, do të zhvillohet një shfaqje e veçantë e operës dhe vallëzimit kinez, “Graceful Rhythms in Motion”. Kjo shfaqje do të sjellë një panoramë të pasur të artit dhe traditës kineze, me performanca nga opera Kunqu, vallëzime tradicionale dhe etnike, si dhe një përvojë të veçantë me grimin dhe kostumet tradicionale kineze. Publiku do të mund të përjetojë magjinë e këtyre formave artistike dhe të shijojë një dialog kulturor mes lindjes dhe perëndimit.
Në fund të Javës Kulturore Kineze, më 26 shtator, Tiranës do t’i ofrohet një shije autentike e kulinarisë kineze. Eventi “The Taste of China” në Pedonalen “Murat Toptani” do të sjellë për publikun gatime tradicionale dhe aromat karakteristike të kuzhinës kineze, duke ofruar një përvojë gastronomike që shkon përtej shijes dhe që shpall një lidhje të thellë mes ushqimit, natyrës dhe harmonisë që pasqyron filozofinë kineze.
Të gjitha aktivitetet janë të hapura dhe pa pagesë për publikun. Ky është një mundësi e shkëlqyer për të eksploruar dhe përjetuar thelbin e një kulture mijëravjeçare, përmes artit, muzikës, vallëzimit dhe shijes, në një bashkëpunim të ngushtë mes Kinës dhe Shqipërisë.
