Një goditje e madhe i është dhënë një rrjeti ndërkombëtar të trafikut të drogës që operonte nga Shqipëria, Spanja dhe Holanda drejt Finlandës, si rezultat i një bashkëpunimi dypalësh midis Strukturës së Posaçme Anti-Korrupsion (SPAK) dhe autoriteteve finlandeze. Hetimi i përbashkët, i cili zgjati dy vjet dhe nisi në qershor të vitit 2023, zbuloi ekzistencën e të paktën katër grupeve kriminale të drejtuara nga shtetas shqiptarë, që dalloheshin për bashkëpunimin mes tyre në trafikimin e lëndëve narkotike, kryesisht atyre sintetike.
Operacioni i zhvilluar në orët e para të së martës, 3 qershor 2025, rezultoi me arrestimin e 9 personave në territorin shqiptar, ndërsa dy të tjerë janë shpallur në kërkim. Paralelisht, në Finlandë, 55 persona që ishin pjesë e këtij rrjeti janë dënuar tashmë. Nga këta, 10 janë shtetas shqiptarë, ndërsa pjesa tjetër përbëhet nga shtetas finlandezë, polakë, rumunë, aziatikë dhe afrikanë. Gjatë këtij hetimi të gjerë, autoritetet kanë sekuestruar një sasi totale prej rreth 300 kilogramësh drogë, e ndarë në 170 kg amfetaminë, 10 kg kokainë dhe 100 kg kanabis, si dhe ekstazi.
Gjatë operacionit për arrestimin e trafikantëve nga forcat e policisë shqiptare dhe agjentët e Byrosë Kombëtare të Hetimit (BKH), u sekuestruan 8 automjete, telefona celularë dhe dokumente të shumta me vlerë për hetimin. Ndër këto dokumente, u gjetën edhe materiale në gjuhën finlandeze, të cilat përmbanin të dhëna të rëndësishme mbi aktivitetin kriminal të personave të përfshirë dhe lëvizjet e parave. Lidhur me paratë e përfituara nga ky aktivitet i paligjshëm, SPAK ka nisur gjithashtu një hetim pasuror për të 11 personat e përfshirë.
Prokurori i SPAK, Alfred Shehu, në një konferencë për mediat, dha detaje mbi mënyrën e funksionimit të këtij grupi kriminal. Ai theksoi se bëhej fjalë për katër grupe të ndryshme, por me lidhje të forta mes tyre, të drejtuara nga shqiptarë. Dy nga drejtuesit kishin origjinën nga Vlora, ndërsa dy të tjerë nga Kuçova dhe Berati, por të gjithë ishin me banim në Tiranë.
“Karakteristikë e këtyre grupeve ka qenë bashkëpunimi i tyre me njëri-tjetrin. Grupe të veçanta bashkëpunonin me njëri-tjetrin për realizimin e qëllimeve të tyre kriminale. Dy nga grupet organizonin trafik nga Shqipëria drejt Spanjës, Holandës dhe Finlandës. Më pas atje kishin rrjetin e shpërndarjes. Një grup tjetër kriminal i drejtuar po nga shtetas shqiptar vepronte vetëm në Finlandë me sigurimin e lëndëve narkotike, blerjen dhe shitjen në Finlandë. Një grup tjetër i drejtuar nga shqiptarë, kishte si detyrë të tij dhe qëllim organizmin e trafikut të marijuanës nga Spanja në drejtim të Finlandës përmes shërbimit postar. Krerët e grupeve një pjesë kanë qenë më parë të ndjekur penalisht në Finlandë dhe nuk kanë qenë të evidentuar në Shqipëri. Pas kthimit në Shqipëri, kanë drejtuar aktivitetin nga Shqipëria ose shtete të tjera të BE. Kjo ka qenë edhe një nga rezultatet e hetimit të përbashkët, nga informacionet e përfituara në kohë reale u transmetoheshin autoriteteve finlandeze,” shpjegoi prokurori Shehu.
Një zyrtar i lartë nga Finlanda tregoi se transporti i lëndëve narkotike kryhej në disa mënyra. Një nga rrugët e përdorura ishte transporti nga Holanda në Finlandë duke përdorur kamionë, shpesh me targa polake dhe shoferë polakë. Ai theksoi se konsumi i lartë i amfetaminës në Finlandë e bënte këtë linjë trafiku nga Holanda veçanërisht fitimprurëse. Ndërkohë, kanabisi dërgohej nga Spanja në Finlandë.
Komisari për Krimin në Byronë Kombëtare të Hetimit në Finlandë, Hans Fagerstrom, theksoi se drejtuesit kryesorë të këtij rrjeti kriminal operonin nga Shqipëria. Ai vlerësoi bashkëpunimin e shkëlqyer me SPAK-un gjatë dy viteve të fundit, duke theksuar se hetimi i gjerë çoi në arrestimin e 55 shtetasve në Finlandë, përfshirë dhjetë shqiptarë. Ai konfirmoi sekuestrimin e rreth 300 kg lëndë narkotike të trafikuara nga Spanja dhe Holanda, duke përfshirë 170 kg amfetaminë, 10 kg kokainë dhe rreth 100 kg marihuanë, si dhe tableta të tjera narkotike.
Kreu i SPAK, Altin Dumani, e cilësoi këtë operacion si një arritje historike, duke qenë se shënon krijimin e njësisë së parë të përbashkët hetimore mes SPAK-ut dhe autoriteteve finlandeze. Ai vuri në dukje se ky bashkëpunim është një dëshmi e qartë se krimi i organizuar shqiptar ka shtrirë aktivitetin e tij edhe në vendet nordike, përfshirë Finlandën. Dumani theksoi se ky hetim tregon vlerësimin që autoritetet ligjzbatuese nordike kanë ndaj strukturave të drejtësisë shqiptare, duke mundësuar goditjen e disa grupeve kriminale që merren me trafikun e drogës, përfshirë drogën sintetike, kokainën dhe marihuanën.
Prokurori Arben Kraja shtoi se hetimi nisi në Shqipëri bazuar në informacione të dërguara nga autoritetet finlandeze, të cilat kishin konstatuar përfshirjen e shtetasve shqiptarë në aktivitet kriminal. Pas regjistrimit të procedimit penal në Shqipëri, u ra dakord të krijohej një skuadër e përbashkët hetimore, e cila u finalizua shpejt dhe rezultoi në këtë goditje të suksesshme.
Një detaj interesant i zbuluar gjatë hetimit është se anëtarët e grupeve kriminale përdornin aplikacione të koduara për komunikim, si Telegram, Signal dhe WhatsApp, një praktikë e zakonshme mes personave të përfshirë në aktivitete kriminale në ditët e sotme, sipas zyrtarit finlandez Hans Fagerstrom. Ai përmendi gjithashtu përdorimin e shpeshtë të shërbimeve të transfertave të parave në Shqipëri.
Kreu i SPAK, Altin Dumani, zbuloi gjithashtu se grupi kriminal kishte krijuar një rrjet të mirëorganizuar në Finlandë dhe dërgonte periodikisht njerëz nga Shqipëria për të kryer shitjen e drogës, me fokus të veçantë tek drogat sintetike. Dumani theksoi se kjo është hera e parë që SPAK ka hasur grupe kriminale shqiptare që kanë në fokus edhe trafikimin e drogërave sintetike, duke qenë se më parë grupet shqiptare ishin kryesisht të angazhuara në trafikun e kokainës, heroinës dhe marihuanës.
Në total, SPAK ka lëshuar 11 masa sigurimi, nga të cilat 9 janë ekzekutuar deri tani. Vijojnë kërkimet për dy personat e tjerë të shpallur në kërkim. Paralelisht me arrestimet, është sekuestruar një numër i konsiderueshëm automjetesh, telefonash celularë dhe dokumentesh, të cilat do të shërbejnë si prova të mëtejshme në hetimin pasuror që po zhvillohet për të gjithë personat e përfshirë. Ky operacion i suksesshëm dëshmon përkushtimin e SPAK-ut dhe autoriteteve finlandeze në luftën kundër krimit të organizuar ndërkombëtar dhe trafikimit të drogës.
