Komuniteti Mysliman i Shqipërisë, në bashkëpunim me Qendrën Bamirëse dhe Humanitare “Mbreti Selman” dhe me koordinimin e Ambasadës së Mbretërisë së Arabisë Saudite në Tiranë, çelën në ambientet e “Medresesë Tiranë”, fushatën e bamirësisë në ndihmë të 5650 familjeve me vështirësi ekonomike në mbarë vendin tonë.
Të pranishëm në ceremoninë e inaugurimit të kësaj fushate, ishin: Nënkryetari i Komunitetit Mysliman të Shqipërisë, z. Lauren Luli, Ambasadori i Arabisë Saudite në Tiranë, z. Fajsal Gazi Hifdhi, Përfaqësuesi i Qendrës Humanitare “Mbreti Selman”, z. Fahad Albauardi, si dhe imamë e familjarë të ndryshëm.
Në fjalën e tij, nënkryetari Luli, falenderoi përfaqësuesit e qendrës “Mbreti Selman” dhe Ambasadorin e Arabisë Saudite në Tiranë, të cilët, për të 7-tin vit radhazi po bëjnë të mundur aplikimin e këtij projekti mjaft të rëndësishëm për familjet në nevojë përgjatë muajit të begatë të Ramazanit.
“Shporta Ushqimore në Shqipëri nuk është thjesht një fushatë shpërndarjeje të produkteve ushqimore, por është një pasqyrë e vërtetë e bashkëpunimit vëllazëror midis Mbretërisë së Arabisë Saudite dhe Shqipërisë, dhe është një shprehje e vlerave të vërteta islame që ftojnë në solidaritet dhe punë të përbashkët për të mirën” – tha z. Luli gjatë fjalës së tij.
Ndërsa z. Fajsal Gazi Hifdhi, ambasador i Mbretërisë së Arabisë Saudite në vendin tonë theksoi gjatë fjalës së tij marrëdhëniet e shkëlqyera ndërmjet dy vendeve tona dhe përforcimin e tyre të vazhdueshëm nëpërmjet nismave të tilla, të cilat e gjejnë burimin te udhëzimet e Mbretit të Arabisë Saudite, Selman bin Abdulaziz dhe Princit të Kurorës, Muhamed bin Selman.
“Kjo iniciativë humanitare buron nga besimi i thellë i Mbretërisë së Arabisë Saudite në rëndësinë e solidaritetit human dhe përpjekjet e saj për të ndihmuar nevojtarët dhe të varfrit, pa bërë dallime apo përjashtime, të frymëzuara këto nga parimet e fesë sonë islame të pastër dhe vlerat tona humane të përbashkëta” – tha Ambasadori në fjalën e tij.
Fushata, ashtu si çdo vit tjetër, konsiston në shpërndarjen e pakove me ndihma të ndryshme ushqimore. Fillimisht pakot me nga 62 kg ushqime secila, do t’ju dorëzohen përfaqësuesve të KMSH-së nëpër myftinitë e vendit, më pas, këta të fundit do t’jua shpërndajnë familjeve në nevojë.
