Bylisi e mbylli në vendin e 9-të garën këtë sezon dhe humbi betejën e mbijetesës vetëm në javën e fundit në Vorë.Mallakastriotët pritet që me hapjen e merkatos të shesin disa nga “xhevahirët” e skuadrës, të cilët mund të bëhen pjesë e ekipeve më të mira në vend ose edhe jashtë Shqipërisë. Megjithatë, në Ballsh ende shpresojnë dhe janë në pritje të verdikteve përfundimtare të këtij sezoni. Tifozët e Bylisit besojnë te një ndryshim i strukturës së kampionatit, çka do t’i shërbente jo vetëm skuadrës së tyre, por edhe rritjes së nivelit të garës, nëse Superiorja do të bëhej me 12 apo 14 ekipe.
Vetëm pasi të përcaktohen verdiktet finale nga FSHF, drejtuesit do të nisin planifi kimin për sezonin e ri. Nëse Bylisi mbetet pjesë e elitës, nuk pritet të ketë shumë ndryshime në skuadër. Por në rast rënieje, ballshiotët do të ndërtojnë një projekt të ri, duke u besuar shumë elementëve të rinj, vendas dhe të huaj. Ditët e fundit të këtij muaji po shërbejnë si periudhë reflektimi për klubin, ndërsa në fillim të qershorit pritet të nisë organizimi konkret për sezonin e ardhshëm.
Deri në mesin e muajit të ardhshëm do të vendoset se cilët lojtarë do të shiten, ndërsa do të rikthehen edhe futbollistët e huazuar te ekipet e tjera. Kujtojmë që Bylisi ka huazuar lojtarë në Orikum, Berat, Delvinë dhe Patos. Organika pritet të jetë e plotë, ndërsa disa futbollistë të moshës 18-22 vjeç do të marrin më shumë përgjegjësi në sezonin e ri.
Një pjesë e tyre kanë provuar të luajnë edhe në elitë. Po ashtu, disa elementë janë pikasur edhe në ndeshjet e skuadrës B në Kategorinë e Dytë dhe pritet të afrohen si pjesë e Bylisit B apo edhe e ekipit të parë, nëse arrijnë të bëjnë diferencën.
Dy javë pas ndeshjes së fundit, në Ballsh ka ende shumë enigma dhe dilema, sidomos për merkaton dhe kategorinë ku do të luajë skuadra sezonin e ardhshëm, teksa në shumë klube të Superiores dhe Kategorisë së Parë po flitet gjithnjë e më shumë për ndryshim strukture dhe shtim ekipesh në të dyja kategoritë.
