Gazetaria shqiptare është në zi pas humbjes së një prej emrave më të shquar të saj, Artur Zheji. Gazetari dhe analisti i njohur ndërroi jetë pasditen e sotme në spitalin e Sarandës, si pasojë e një arresti kardiak. Ai ishte 64 vjeç.
Ngjarja tragjike ndodhi në Sarandë, ku Zheji ndodhej për pushime me familjen. Sipas informacioneve paraprake, ai po drekonte në një restorant në rrugën “Butrinti” kur papritur u ndje keq. Pavarësisht ndërhyrjes së shpejtë dhe transportit me ambulancë drejt spitalit rajonal “Petro Nako”, Zheji nuk arriti t’u mbijetonte problemeve shëndetësore.
Në një njoftim zyrtar, Policia e Sarandës konfirmoi ngjarjen, duke deklaruar se rreth orës 16:10, shtetasi A. Zh., banues në Tiranë, kishte shfaqur probleme shëndetësore dhe kishte ndërruar jetë gjatë transportit drejt spitalit.
Artur Zheji ishte një figurë me ndikim në debatin publik shqiptar. Me një karrierë të gjatë si gazetar, publicist dhe drejtues emisioni, ai la gjurmë të pashlyeshme. Zheji ishte djali i intelektualit të njohur Petro Zheji dhe aktores Besa Imami. Për një kohë të gjatë ai drejtoi emisionin televiziv “360 Gradë” ku shquhej për analizat e tij të thella dhe qëndrimet unike. Humbja e tij përbën një humbje të madhe për botën e medias dhe opinionin publik në Shqipëri.
