Një denoncim i mbërritur pranë redaksisë së Timoni.al ka hedhur dritë mbi një skemë të dyshuar kontrabande me naftë që, sipas burimeve, po rrezikon seriozisht tregun e transportit rrugor në Shqipëri. Në qendër të akuzave qëndron kompania “Edi & Sena Travel & Tours”, e njohur edhe me emrin tregtar të dytë “Top Tours”, e cila operon me linjën e përditshme Tiranë–Prishtinë–Tiranë.
Denoncimi i mbërritur në redaksinë tonë:
Kompania me emrin tregtar Edi&Sena Travel&Tours, me emer tregtar te dyte Top Tours, qe ka linje Tirane-Prishtine-Tirane cdo dite ne bashkepunim me autoritetet doganore fut nafte kontrabande nga Kosova
Lidhjet midis ortakut Edison Cani dhe autoriteteve doganore kundrejt rushfeteve kalojne qindra litra nafte kontrabande me autobusin e tyre nepermjet pikes doganore te Morines.Nafta depozitohet ne parkimin e tij qe ndodhet ne fund te rruges se burgut Tirane,ku ka depizote nafte.
Kjo nafte kontrabande perdoret per autobusat e tij dhe mjeteve te transportit te vellait te tij Lavdi Cani qe ka linje Tirane-Pogradec-Tirane
Mund ta verifikoni shume kollaj nepermjet kamerave qe ndodhen ne parkim ku autobuset shkarkojne nafte dhe ngarkojne nafte.
Skema e dyshuar e kontrabandës
Sipas denoncimit, kompania në fjalë, përmes lidhjeve të dyshuara me autoritete doganore në pikën kufitare të Morinës, ka mundësuar futjen në Shqipëri të qindra litrave naftë kontrabandë nga Kosova. Kjo naftë, e cila sipas burimeve transportohet me autobusët e linjës ndërkombëtare, dyshohet se depozitohet më pas në një bazë pranë parkimit në fund të rrugës së burgut të Tiranës, ku ndodhen rezervuarë të fshehtë.
Sipas të njëjtit burim, karburanti i kontrabanduar përdoret për të furnizuar flotën e autobusëve të kompanisë dhe gjithashtu automjetet e transportit të vëllait të ortakut, Lavdi Cani, i cili operon në linjën Tiranë–Pogradec–Tiranë. Nëse këto akuza do të vërtetohen, skema e kontrabandës jo vetëm që i jep kompanisë një avantazh të padrejtë ekonomik, por edhe rrezikon të shkatërrojë konkurrencën e ndershme në treg, duke detyruar operatorët e tjerë të ulin çmimet përtej kufijve të përballueshëm.
Efekti në treg
Marrja e naftës më lirë në rrugë të paligjshme i mundëson kompanisë të ulë çmimet e biletave, duke dalë fitim në një treg ku operatorët e ndershëm, të cilët blejnë karburantin me çmimet e larta të tregut shqiptar, po përballen me humbje të konsiderueshme. Ky mekanizëm, sipas ekspertëve të ekonomisë që konsultoi redaksia, çon në “shkatërrim të konkurrencës së lirë dhe krijon një klimë tregu të deformuar, ku fiton jo profesionalizmi, por trafiku i kontrabandës”.
Reagimi i kompanisë
I kontaktuar nga Timoni.al, përfaqësuesi i kompanisë, Vlad Cani, i cilësoi akuzat si “shpifje dhe të pavërteta” që dëmtojnë rëndë imazhin e biznesit të tyre.
“Ne blejmë naftë si në Shqipëri, ashtu edhe në Kosovë, gjithmonë sipas rregullave dhe me fatura të rregullta. Nuk kemi kryer dhe nuk kryejmë kontrabandë, ashtu siç pretendohet. Për të qenë transparentë, kemi vënë në dispozicion edhe faturat që e vërtetojnë këtë gjë”, – u shpreh Cani në reagimin e tij zyrtar, duke hedhur poshtë çdo pretendim për lidhje me doganat apo futje të paligjshme të karburantit në vend.
Çfarë mbetet për t’u verifikuar
Pavarësisht mohimit të kompanisë, denoncimi përmend edhe elementë të verifikueshëm, si parkimi në fund të rrugës së burgut të Tiranës ku dyshohet se shkarkohet dhe ngarkohet karburanti. Kamera sigurie në atë zonë, sipas burimeve, mund të japin një provë të qartë mbi lëvizjet e autobuzëve dhe aktivitetet e dyshimta që zhvillohen aty.
Thirrje për hetim
Çështja tashmë ngre disa pyetje të rëndësishme:
- A ka vërtet lidhje mes kompanisë dhe autoriteteve doganore?
- A janë faturat e paraqitura një mbulesë për një aktivitet paralel të paligjshëm?
- Pse deri tani institucionet përkatëse nuk kanë ndërhyrë për të monitoruar këtë situatë që prek drejtpërdrejt konsumatorët dhe konkurrencën?
Duke qenë se bëhet fjalë për një aktivitet që prekin jo vetëm biznesin e ndershëm por edhe financat e shtetit, është detyrë e autoriteteve ligjzbatuese që të hetojnë denoncimin dhe të japin një përgjigje për publikun./Timoni.al/
