Oficeri i lartë ushtarak i NATO-s u kërkon aleatëve dhe liderëve të planifikojnë për të papriturën në Ukrainë.
Ai tha se lufta në Ukrainë mund të “përcaktojë fatin e botës”, për pasojë ushtritë dhe liderët politikë perëndimorë duhet të ndryshojnë në mënyrë drastike mënyrën se si e ndihmojnë Kievin të shmangë forcat pushtuese ruse.
Në një takim të oficerëve të lartë të NATO-s në selinë e saj në Bruksel, kryetari i komitetit ushtarak të NATO-s, Rob Bauer tha gjithashtu se pas arsyetimit të Putinit për luftën qëndron frika nga demokracia, raporton Associated Press.
“Ne kemi nevojë për aktorë publikë dhe privatë që të ndryshojnë mentalitetin e tyre për një epokë në të cilën gjithçka ishte e planifikuar, e parashikueshme, e kontrollueshme dhe e fokusuar në efikasitet në një epokë në të cilën çdo gjë mund të ndodhë në çdo kohë. Një epokë në të cilën duhet të presim të papriturën. Për të qenë plotësisht efektiv, edhe në të ardhmen, ne kemi nevojë për një transformim luftarak të NATO-s. Sot është dita e 693-të e asaj që Rusia mendonte se do të ishte një luftë tre-ditore. Ukraina do të ketë mbështetjen tonë për çdo ditë që do të vijë, sepse rezultati i kësaj lufte do të përcaktojë fatin e botës.
Kjo luftë nuk ka qenë kurrë për ndonjë kërcënim real të sigurisë për Rusinë që vjen nga Ukraina apo NATO. Kjo luftë ka të bëjë me frikën e Rusisë nga diçka shumë më e fuqishme se çdo armë fizike në tokë – demokracia. Nëse njerëzit në Ukrainë mund të kenë të drejta demokratike, atëherë edhe njerëzit në Rusi së shpejti do t’i dëshirojnë ato”, tha ai.
