Gjykata e Shkallës së Parë e Juridiksionit të Përgjithshëm Dibër vendosi këtë të shtunë lirimin e katër prej pesë punonjësve të stafit teknik të kompanisë minerare , të arrestuar pas aksidentit tragjik që i mori jetën minatorit 66-vjeçar, Fari Veliu. Njëri prej të shoqëruarve pas aksidentit, Nj. P., me detyrë armator ishte lënë i lirë një ditë pas njoftimit nga Policia e Dibrës.
Prokuroria kërkoi që arrestimet në flagrancë të këtyre personave të vlerësoheshin si të ligjshme dhe që për një pjesë të tyre, hetimet të vijonin në gjendje të lirë, ndërsa për të tjerët të caktohej masa e sigurimit “arrest në shtëpi”. Këto kërkesa u pranuan në tërësi nga gjyqtarja, Flutura Çuko.
Sipas vendimit, personat me iniciale F. T., 61 vjeç, dhe B. Ç., 68 vjeç, do të hetohen në gjendje të lirë, ndërsa për E. K., 35 vjeç, dhe E. Xh., 51 vjeç, u caktua masa e sigurimit “arrest në shtëpi”.
Policia e Dibrës kishte njoftuar të enjten arrestimin e pesë punonjësve, të cilët akuzohen për “shkelje të rregullave të mbrojtjes në punë” me pasojë vdekjen, pas rënies së një masivi shkëmbor brenda galerisë ku punonte viktima. Ngjarja ndodhi në një galeri në pronësi të “GERTI Sh.p.k.”, kompani e administruar nga biznesmeni Jeton Dani, i njohur për aktivitetin në sektorin minerar dhe lidhjet politike me Partinë Socialiste.
Burime nga Inspektorati i Punës i thanë BIRN se kjo nuk është hera e parë që në këtë subjekt ndodhin aksidente në punë. Në vitet 2023 dhe 2024 janë regjistruar dy ngjarje me plagosje të punëtorëve – një me thyerje të këmbës dhe tjetri me thyerje të legenit. Megjithatë, inspektorati nuk ka kompetencë të hyjë në galeri, kontrolli aty kryhet nga Autoriteti Kombëtar për Sigurinë dhe Emergjencat në Miniera, në varësi të Ministrisë së Infrastrukturës dhe Energjetikës.
Ky është aksidenti i tretë me pasoja fatale në zonën e Bulqizës dhe Klosit gjatë këtij viti.
BIRN ka gjetur se arrestime të ngjashme, pas aksidenteve të rënda në minierat e Bulqizës, kanë qenë kryesisht simbolike dhe të arrestuarit nuk janë mbajtur përgjegjës. Ky cikël arrestimesh simbolike, pa pasoja reale për përgjegjësit, është kthyer në një praktikë të përsëritur për aksidentet në sektorin minerar, që nuk ka sjellë përmirësim të kushteve dhe sigurisë në punë, dhe as drejtësi për viktimat.
Fari Veliu ishte një prej minatorëve të vjetër në qytetin e Bulqizës, i cili – pavarësisht moshës së pensionit – ishte rikthyer në galeri për shkak të pamundësisë ekonomike për të përballuar jetesën vetëm me pension. Shokë të punës së tij tregojnë për BIRN se ai kishte dekada përvojë në nëntokë.
