Presidenti i Partisë së Lirisë, Ilir Meta në një intervistë ekskluzive për Politiko.al është shprehur se gjysma e njerëzve që ndodhen në burgun ku ai është janë dënuar kot ose për të mbushur statistikat.
I pyetur sesi është ndodhur në burg, Meta është shprehur se është përshtatur shumë mirë dhe e konsideron si një periudhë detoksifikimi dhe ripërtëritjeje.
Politiko: A keni hasur probleme në ambientet e burgut? Si sillen me ju?
Meta: Edhe në burg ka jetë dhe është interesante.
Këtu më shumë se gjysma e njerëzve janë të dënuar kot ose sa për të fryrë statistikat.
Para disa ditësh u lirua, për fat të mirë, një burrë i vjetër, saldator, i cili ishte futur si pjesë e një grupi të strukturuar kriminal, pa patur asnjë lidhje e njohje me atë grup.
Ai thjesht i kishte bërë nje saldim një personi të panjohur të cilit për hakun e punës i kishte marre 10 euro.
Më pas me këtë mjet ishte transportuar një ngarkesë kanabis dhe te makina kishin dale gjurmët e gishtave të saldatorit i cili s’kishte asnjë njohje me autorët dhe as dijeni se çfarë bënin ata.
Më në fund, mbas 16 muajsh, një gjykatës e kishte lexuar me kujdes dosjen dhe e liroi një hallexhi që kishte 5 fëmijë për të rritur.
Raste të tilla ka pafund.
Personalisht jam përshtatur shumë mirë dhe e konsideroj si një periudhë detoksifikimi dhe ripërtëritjeje.
