Shtetet e Bashkuara anulojnë zyrtarisht 83% të programeve të Agjencisë Amerikane për Zhvillim Ndërkombëtar (USAID) pas 6 javësh analize.
Arsyeja është keqpërdorimi i miliarda dollarëve që nuk përputheshin me interesat amerikane.
Ky lajm është bërë me dije nga vetë Marco Rubio i cili njoftoi se administrata Trump ka vendosur mbylljen e 83% të programeve të ofruara nga USAID.
“Pas një rishikimi 6-javor, ne po anulojmë zyrtarisht 83% të programeve në USAID. 5,200 kontratat që tani janë anuluar shpenzuan dhjetëra miliarda dollarë në mënyra që nuk i shërbenin (dhe në disa raste edhe dëmtonin) interesat thelbësore kombëtare të Shteteve të Bashkuara. Në konsultim me Kongresin, ne synojmë që 18% e mbetur e programeve që po mbajmë (afërsisht 1,000) tani të administrohen në mënyrë më efektive nën Departamentin e Shtetit. Faleminderit DOGE dhe stafit tonë që punuan me orë të tëra për të arritur këtë reformë të vonuar dhe historike,” shkruan Rubio në X.
Kujtojmë se më 27 shkurt, administrata amerikane ndërpreu afro 5800 fonde të USAID-it, duke mbajtur vetëm 500 me vlerë 57 miliardë dollarë.
Në veçanti, u raportua se ulja e ndjeshme e ndihmës së huaj po godet punën e organizatave jofitimprurëse dhe kontraktorëve. Programet e ndihmës në të gjithë botën u pezulluan për shkak të një ngrirjeje të plotë të financimit dhe një rishikimi prej miliarda dollarësh në ndihmë.
