Detaje të reja janë zbardhur lidhur me operacionin e fundit antidrogë, ku autoritetet zbuluan një rast të dyshuar të shpërndarjes së lëndëve narkotike përmes shit blerjeve që bëheshin në rrugë dhe me celularë.
Sipas materialeve hetimore, më 19 nëntor 2025, rreth orës 20:37, në zonën e rrugës “Papa Gjon Pali II” në Tiranë, është bërë blerja e dy dozave me lëndë të dyshuar narkotike të llojit kokainë.
Shitja e kokainës është kryer nga shtetasi Artan Pullazi, i cili në momentin e veprimit ndodhej në shoqërinë e shtetasit Erald Sina. Të dy ata i kanë dhënë një qese me kokainë një personi.
Burime nga hetimi bëjnë me dije se pas ndërhyrjes së policisë, lënda e dyshuar narkotike u sekuestrua dhe u peshua, duke rezultuar me një peshë totale prej 0.8 gram, përfshirë edhe ambalazhin. Materiali më pas u dërgua për ekspertim në Institutin e Policisë Shkencore.
Rasti ka tërhequr vëmendje edhe për shkak se dy personat e përfshirë në këtë episod mbajnë pozicione drejtuese pranë kompanisë “One Albania”, fakt i cili është bërë pjesë e verifikimeve nga ana e organeve proceduese. Deri në këtë fazë, nuk ka një qëndrim zyrtar publik nga kompania lidhur me çështjen.
Artan Pullazi dhe Erald Sina janë mes 22 personave të arrestuar në kuadër të këtij operacioni të gjerë. Gjatë seancës për vlerësimin e masave të sigurisë, ata kanë mohuar çdo lidhje me shitjen e lëndëve narkotike, duke pretenduar se nuk janë të përfshirë në aktivitet të paligjshëm.
Megjithatë, Gjykata vendosi masën e sigurisë “arrest në burg” për të dy, duke vlerësuar se ekzistojnë dyshime të arsyeshme dhe kushte ligjore për vijimin e hetimeve në këtë formë.
Hetimet vijojnë për zbardhjen e plotë të rrethanave dhe për përcaktimin e rolit konkret të secilit prej të dyshuarve në këtë çështje.
