Këngëtari i famshëm grek Giorgos Mazonakis ka reaguar pas lajmit se u mbyll në spitalin psikiatrik “Dromokaiteio” nga motra dhe familjarë të tjerë. Përmes një deklarate të shpërndarë nga avokati i tij, Mazonakis theksoi se është në gjendje të mirë shëndetësore dhe se nuk vuan nga asnjë sëmundje mendore.
“Mbyllja ime e përkohshme këtu u bë pa më vënë në dijeni. Nuk vuaj nga ndonjë sëmundje mendore që kërkon kujdes psikiatrik. Pas kësaj prove fshihet një metodë e neveritshme”, u shpreh ai.
Mediat greke raportojnë se konflikti mes artistit dhe familjarëve të tij lidhet me pasurinë, ndërsa mes tyre ka edhe një proces gjyqësor disa-vjeçar. Avokati i këngëtarit tha se ai pritet të kthehet në shtëpi ditën e hënë, duke e cilësuar manovrën si të qëllimshme.
Ndërkohë, familja e Mazonakis reagoi përmes avokatëve të saj duke theksuar se prioritet mbetet shëndeti dhe siguria e këngëtarit.
