Mali i Zi ka ndërmarrë një tjetër ulje të përkohshme të akcizave për karburantet, duke synuar të frenojë rritjen e kostove për konsumatorët.
Vendimi i qeverisë, i cili hyn në fuqi më 25 gusht, parashikon uljen e akcizës si për benzinën, ashtu edhe për naftën, shkruan seenews.
Për benzinën pa plumb, akciza zbret në 0.522 euro për litër, ndërsa për naftën reduktohet në 0.352 euro për litër. Këto nivele do të aplikohen deri më 5 shtator.
Efekti i masës është reflektuar edhe në çmimet me pakicë. Nafta do të shitet me 1.87 euro për litër, ndërsa Eurosuper 98 me 1.79 euro. Të dyja produktet kanë pësuar një ulje prej 0.01 euro për litër.
Ndërkohë, Eurosuper 95 do të vijojë të kushtojë 1.76 euro për litër.
Çmimet e reja do të vlejnë deri më 31 gusht. Më pas, Ministria e Energjisë do të bëjë rishikimin për javën e parë të shtatorit, duke marrë në konsideratë çmimet ndërkombëtare të naftës gjatë shtatë ditëve dhe kursin e këmbimit.
Kjo nuk është ndërhyrja e parë e Podgoricës. Qeveria malazeze nisi uljen e përkohshme të akcizave në fund të marsit dhe që atëherë i ka rishikuar disa herë ato, në varësi të zhvillimeve në tregjet ndërkombëtare.
Në të njëjtën periudhë, Mali i Zi ndryshoi edhe mekanizmin e përcaktimit të çmimeve, duke e shkurtuar nga 14 në 7 ditë periudhën e rishikimit të çmimeve, me qëllim që tregu vendas të reagojë më shpejt ndaj ndryshimeve të çmimeve globale.
