Ish-ministri i Mjedisit, Lefter Koka, ka lënë përkohësisht qelinë e burgut të Durrësit.
Mësohet se Koka ka marrë 8 orë leje për shkak të një problemi familjar.
Siç mësohet, Lefter Koka ka shkuar të vizitojë të ëmën që vuan nga një problem shëndetësor.
Leja për ish-ministrin Koka është aprovuar nga Drejtoria e Përgjithshme e Burgjeve.
Lefter Koka është shoqëruar nga forca të shumta policie dhe do të kthehet sërish në qelinë e burgut të Durrësit pas disa orësh.
Ish-ministri i Mjedisit mbahet në qeli që prej dhjetorit të vitit 2021, për çështjen e inceneratorëve.
Kujtojmë se Lefter Koka është dënuar me 2 vite burg për inceneratorin e Tiranës, proces që u krye me gjykim të shkurtuar. Për shkak të kohës së qëndrimit në paraburgim, dënimi për inceneratorin e Tiranës konsiderohet i shlyer.
Por, ish-ministri i Mjedisit ka dhe një dënim tjetër me 6.8 vite burg për inceneratorin e Elbasanit.
Ndërsa për inceneratorin e Fierit, ku sërish është i përfshirë Lefter Koka, çështja është në rigjykim.
