Deputeti i Partisë Demokratike, Ivi Kaso, i ka kërkuar kreut të SPAK, Klodian Braho, të bëjë publikë emrat e politikanëve shqiptarë që, sipas materialeve hetimore të njohura si dosja “Aruba”, dyshohet se kanë marrë pjesë në takime ku është diskutuar përdorimi i Shqipërisë për pastrimin e parave.
Gjatë raportimit të drejtuesit të Prokurorisë së Posaçme në Komisionin Parlamentar, Kaso pyeti nëse SPAK ka detyrimin t’i informojë qytetarët se cilët janë politikanët e përfshirë në këtë çështje, pavarësisht përkatësisë së tyre politike.
“Kush janë politikanët shqiptarë që kanë qenë në takimin e Arubës? A kanë pasur mandat qeverisës? A mendoni se publiku meriton të dijë se kush janë këta persona?”, u shpreh deputeti demokrat.
Kaso iu referua edhe deklaratave të kryeministrit Edi Rama për këtë dosje, duke pretenduar se fokusi është zhvendosur vetëm te çështja e falsifikimit të pronave në bregdet, ndërsa, sipas tij, nuk është dhënë asnjë sqarim për zyrtarët që mund të kenë marrë pjesë në takimet e përmendura dhe përfituesit e mundshëm.
Në përgjigje, kreu i SPAK nuk dha detaje mbi hetimin, duke theksuar se çështja është ende në proces.
“Është çështje në hetim, por nuk mund të ndodhë në SPAK që të ketë një provë dhe ajo të lihet aty në gjumë dhe të mos reagohet”, deklaroi Braho, pa komentuar më tej mbi identitetin e personave të përfshirë.
