Kompania ajrore Air Albania është duke përjetuar probleme të theksuara financiare, fakt i cili nuk është pranuar asnjëherë publikisht, pavarësisht se të dhënat dhe zhvillimet më të fundit e konfirmojnë këtë.
Që prej themelimit, kompania ka operuar me dy deri në tre avionë, në varësi të nevojave të trafikut.
Gjatë muajve të fundit, siç konstaton edhe Skyweb.al nga verifikimi i burimeve të hapura, kompania ka vetëm një avion në dispozicion dhe po operon vetëm linjën Tiranë–Stamboll–Tiranë.
Fluturimi i sotëm për në Verona nuk është kryer. Po ashtu, nuk u realizuan as fluturimet e planifikuara për dje drejt Bergamos dhe Veronës.
Siç rezulton nga faqja zyrtare e Air Albania, kompania ka hequr thuajse të gjitha linjat nga sistemi, duke mos shitur bileta për asnjë destinacion tjetër përveç Stambollit.
Sistemi pasqyron një rikthim të fluturimeve në fund të shtatorit drejt Milanos (Malpensa), megjithatë mbetet për t’u parë nëse kompania planifikon të marrë me qira një avion tjetër apo do të koordinohet vetëm me të vetmin avion që zotëron aktualisht.
Gjithçka nisi pasi Air Albania nuk po paguante qiranë e dy avionëve Airbus A320-200 të marrë me qira nga kompania GA Telesis. Kjo e fundit ka çuar çështjen në gjykatë, duke kërkuar detyrimin e Air Albania për të shlyer pagesat e prapambetura.
Sipas raportimeve mediatike, kompania duket se ka probleme edhe me pagesën e stafit bazik, siç janë sanitaret, ndërsa vonesat në dhënien e pagave për pilotët dhe stjuardesat konsiderohen ndërkombëtarisht si një shkelje e rëndë e sigurisë së pasagjerëve.
Aktualisht, Air Albania po operon me një avion A320-200 të marrë me qira nga kompania bullgare Sky2Fly. Avioni me numër serial MSN 4247 është prodhuar në vitin 2010 dhe deri më tani është dhënë me qira nga Azia në Afrikë e tani në Europë përmes Air Albania.
Skyweb.al konsultoi historikun e këtij avioni, ku rezulton se ai është përdorur fillimisht në Hong Kong për gati 10 vite dhe më pas në Irlandë.
Më tej, avioni ka shërbyer nën flamurin e kompanisë libiane Crown Airlines në Afrikën e Veriut me kodin 5A-TAK.
Para se të merrej nga Air Albania, Airbus A320-200 ka operuar për tre vite në Nigeri për kompaninë “United Nigeria”.
Një ndër avionët e Air Albania, ai Airbus A319 është përdorur për disa vite si charter i qeverisë shqiptare, por sëfundmi kryeministri Rama u pa duke fluturuar me një avion tjetër, në pronësi të një kompanie turke që jep chartera me qira.
Industria e aviacionit civil është një ndër më të kontrolluarat, ku standardet e vendosura nga Autoriteti i Aviacionit Civil dhe Agjencia Evropiane e Sigurisë së Aviacionit (EASA) janë të detyrueshme për t’u zbatuar nga kompanitë ajrore.
Megjithatë, situata në Air Albania duket më specifike dhe kërkon vëmendje të veçantë, nisur nga zhvillimet e fundit me pagesat e stafit dhe problemet me qiramarrjen e avionëve. /skyweb.al
