Teherani reagon me tone të ashpra ndaj Kombeve të Bashkuara, pas rikthimit të sanksioneve ndërkombëtare për shkak të dështimit në përmbushjen e angazhimeve bërthamore.
Ministri i Jashtëm iranian, Abbas Araghchi, i ka dërguar një letër zyrtare Sekretarit të Përgjithshëm të OKB-së, ku kërkon ndalimin e çdo mekanizmi për zbatimin e sanksioneve ndaj vendit të tij.
Në një mesazh të publikuar në rrjetin social X, Araghchi shkruan:
“Ju bëjmë thirrje të parandaloni çdo përpjekje për të ringjallur mekanizmat e sanksioneve, përfshirë Komitetin e Sanksioneve dhe Grupin e Ekspertëve. Irani nuk do të njohë asnjë përpjekje për të zgjatur, ringjallur ose zbatuar sanksionet e OKB-së.”
Kjo deklaratë vjen vetëm pak orë pasi sanksionet e OKB-së ndaj Iranit u rivendosën në mënyrë zyrtare, saktësisht 10 vjet pas heqjes së tyre në kuadër të marrëveshjes bërthamore të vitit 2015.
Rivendosja e sanksioneve u bë përmes mekanizmit të njohur si “snapback”, i cili lejon rikthimin automatik të sanksioneve nga Këshilli i Sigurimit të OKB-së, në rast se Irani nuk respekton detyrimet e tij bërthamore.
Shtetet evropiane (Franca, Gjermania dhe Britania), të mbështetura nga SHBA, e akuzojnë Iranin se ka shkelur thuajse të gjitha angazhimet e marrëveshjes, përfshirë pasurimin e uraniumit mbi nivelet e lejuara, si dhe mospërputhjen me inspektimet ndërkombëtare
