Komisioni i Posaçëm Parlamentar për Reformën Zgjedhore, i cili nisi punën ditën e djeshme i është adresuar me dy kërkesa zyrtare OSBE/ODIHR-it dhe Komisionit të Venecias, për të siguruar asistencë teknike dhe ekspertizë profesionale gjatë hartimit të reformës së re zgjedhore.
Në letren dërguar Maria Telalian, drejtore e ODIHR bashkëkryetarët Damian Gjiknuri dhe Oerd Bylykbashi shprehin mirënjohjen për rolin dhe kontributin e pandërprerë të institucionit në forcimin e standardeve zgjedhore dhe zhvillimin demokratik në Shqipëri.
Komisioni kërkon angazhimin e ekspertëve të ODIHR-it për të asistuar në hartimin e ndryshimeve ligjore dhe për adresimin e rekomandimeve të paplotësuara të raporteve të zgjedhjeve të viteve të fundit.
Në një letër të veçantë drejtuar Presidentes së Komisionit të Venecias, Claire Bazy-Malaurie, Komisioni i Reformës Zgjedhore kërkon kontribut me rekomandime dhe ekspertizë nga trupi këshillimor i Këshillit të Evropës, duke vlerësuar rëndësinë e këtij institucioni në konsolidimin e bazës ligjore dhe të proceseve demokratike.
