Një 17-vjeçar është dhunuar brutalisht mbrëmjen e së enjtes në zonën e Mataragës, në Agrinio të Greqisë, teksa ndodhej në një lokal së bashku me miqtë e tij.
Sipas informacioneve paraprake, katër persona të maskuar, të cilët mbërritën me taksi në vendngjarje, kanë hyrë në ambient dhe e kanë nxjerrë me forcë të miturin jashtë, ku e kanë goditur brutalisht. Dyshohet se njëri prej autorëve e ka kërcënuar edhe me thikë gjatë sulmit.
Policia greke ka bërë të ditur se ka identifikuar njërin nga autorët, i cili është shtetas shqiptar dhe aktualisht është shpallur në kërkim
17-vjeçari ka pësuar dëmtime në kokë dhe është transportuar në spitalin e Agrinios, ku ka marrë ndihmën e parë mjekësore.
Sipas personave nga rrethi shoqëror i të miturit, shkaku i sulmit dyshohet të ketë qenë një keqkuptim i çastit, pa ndonjë konflikt të mëparshëm serioz. Megjithatë, autoritetet greke po vijojnë hetimet për të zbardhur plotësisht rrethanat e ngjarjes.
