Deputetja e Partisë Demokratike, Jorida Tabaku, ka shprehur falënderimet e saj për demokratët e Tiranës, të cilët e mbështetën në procesin e primareve dhe theksoi se ky është vetëm fillimi i një sfide të re për të përfaqësuar qytetarët.
Në një postim në rrjetet sociale, Tabaku theksoi se asgjë nuk i është falur në Partinë Demokratike, duke theksuar se çdo betejë e ka fituar me punë dhe përkushtim.
Ajo siguroi se do të vazhdojë të përfaqësojë qytetarët e Tiranës dhe të gjithë shqiptarët në Parlament, duke u angazhuar për një ekonomi më të mirë, për shtresën e mesme, për luftën kundër korrupsionit dhe për integrimin e Shqipërisë në Bashkimin Europian.
Ajo u shpreh e gatshme të vazhdojë t’i shërbejë qytetarëve dhe t’i përfaqësojë ata me dinjitet dhe vendosmëri në parlamentin e ri.
Postimi:
Faleminderit demokratëve të Tiranës për besimin!
Fitova primaret me mbështetjen tuaj dhe isha ndër më të votuarit, por sot nis një sfidë të re—betejën për Tiranën në listën e hapur!
Në Partinë Demokratike asgjë nuk më është falur. Çdo betejë e kam fituar me punë dhe përkushtim, dhe ashtu do të ndodhë edhe tani! Do të jem në Parlamentin e ri për të përfaqësuar jo vetëm demokratët që më votuan, por edhe ata që ende nuk e shohin veten të përfaqësuar. Për një ekonomi më të mirë, për shtresën e mesme, për familjet shqiptare, për integrimin Europian dhe për luftën ndaj korrupsionit!
Betejat nuk më trembin! Nuk më trembi komisioni hetimor, as pronarët e inceneratorëve që sot janë në arrati apo në qeli. Nuk më trembi as beteja për profesionet e lira dhe të drejtat e qytetarëve. Ndaj nuk do të më trembë as kjo sfidë!
Për mua nuk ka pasur dhe nuk do të ketë privilegj më të madh sesa të jem zëri i demokratëve dhe të vazhdoj t’ju përfaqësoj me dinjitet dhe vendosmëri!
