Kandidatja për deputete në listën e hapur të Partisë Demokratike, Jorida Tabaku, ka publikuar sot spotin e saj të parë elektoral me titullin “Jorida Tabaku – Zëri Juaj në Kuvend”.
Ky spot përmbledh tri nga betejat më të forta dhe përfaqësuese të mandatit të saj: luftën kundër korrupsionit, mbrojtjen e profesionistëve të lirë dhe angazhimin për një ekonomi të ndershme që punon për qytetarët.
Spotit i paraprin një mesazh i qartë: zëri i qytetarëve nuk duhet të mungojë në Kuvend – dhe Jorida Tabaku ka qenë dhe do të jetë ai zë.
Në video pasqyrohen përplasjet në Komisionin Hetimor të Inceneratorëve, ku Tabaku ka qenë në krye të denoncimeve për aferën më të madhe korruptive të kësaj qeverie. Pamjet përfshijnë debatet e drejtpërdrejta me kryeministrin Rama dhe inspektimet në terren në inceneratorin e Tiranës, duke theksuar rolin e saj si një zë i guximshëm kundër abuzimit me fondet publike.
Më tej, spoti ndalet tek beteja për profesionistët e lirë, ku pas një viti përpjekjesh të pandërprera, Tabaku arriti të ndihmojë në rrëzimin e një ligji të padrejtë që godiste shtresën e mesme. Kjo fitore është simbol i një politike që dëgjon dhe vepron për qytetarët.
Në fund, fokusi kalon tek kriza ekonomike – taksat e rënda, çmimet në rritje dhe rënia e të ardhurave. Tabaku ofron një vizion për një shtet më efikas, një sistem të drejtë dhe një ekonomi që i jep frymëmarrje familjeve shqiptare.
