Ish-ministri i Vetëvendosjes, Liburn Aliu, është përfolur sot si drejtori i ri i Portit të Durrësit. I pari që “zbardhi” emërimin ishte vetë një ministre e Ramës, Mirela Kumbaro.
Me entuziazëm, ajo e quajti një “zgjedhje të goditur” të zv.kryeministres Belinda Balluku, duke vlerësuar Aliun si “atdhetar dhe funksionar të provuar”, madje dhe si një bashkëpunëtor të saj të dikurshëm.
“Durrësi ka qenë gjithmonë porta e përbashkët drejt Adriatikut, si për Shqipërinë ashtu edhe për Kosovën”, shkroi Kumbaro përpara se postimi të zhdukej si me magji.
“Durrësi ka qenë gjithmonë porta e përbashkët drejt Adriatikut, si për Shqipërinë ashtu edhe për Kosovën, ndaj nuk mund të kishte zgjedhje më të mirë për ta mishëruar këtë vizion të përbashkët.
Liburni është një atdhetar dhe funksionar i provuar publikisht, me të cilin, si ish-Ministre e Mjedisit, kam pasur bashkëpunim të shkëlqyer gjatë kohës kur ai drejtonte sektorët e mjedisit dhe planifikimit hapësinor si Ministër në Kosovë”, shkruante Kumbaro.
Liburn Aliu, ndër themeluesit e Vetëvendosjes dhe një nga njerëzit më të afërt me Kurtin, kishte “ndarë rrugët” më 27 gusht 2025, pas përplasjes për zgjedhjen e Dimal Bashës në krye të Kuvendit.
Tani, pas “divorcit” me Kurtin, duket se po hyn në ujërat e Ramës.
