Ish-ministri i Brendshëm, Sandër Lleshaj, del hapur në mbështetje të protestave qytetare dhe kritikon ashpër qeverisjen e Edi Ramës, duke e cilësuar valën e protestave si një zhvillim “normal” dhe të nevojshëm për demokracinë shqiptare.
Në një intervistë për gazetën “Panorama”, Lleshaj shprehet se qytetarët kanë të drejtë të protestojnë dhe se politika duhet t’i dëgjojë, pa u përpjekur të delegjitimojë kërkesat e tyre.
“Protestat kanë sjellë një dinamikë të re dhe të nevojshme në jetën e vendit, pas një periudhe relativisht të gjatë letargjie politike dhe shoqërore”, deklaron Lleshaj.
I pyetur nëse Edi Rama duhet të japë dorëheqjen për t’i hapur rrugë një zgjidhjeje politike, Lleshaj nuk jep një përgjigje të drejtpërdrejtë, por përcjell një mesazh të fortë për kryeministrin.
“Sikur të kisha komunikim me Kryeministrin dhe vullnetin e tij për një këshillë, mbase do t’ia kisha dhënë, por koha e ka sjellë edhe shuarjen e këtij komunikimi. Personalisht mendoj se dorëheqja nuk është ndonjë dramë, por një lloj bekimi që njeriu përjeton në momentin kur koha është pjekur për të. Unë vetë e kam përjetuar këtë bekim në vitin 2020, kur hoqa dorë nga posti i ministrit të Brendshëm për arsye se njëri ndër mijëra punonjësit e policisë bëri një krim në mesnatë gjatë shërbimit të tij në patrullë”, thotë Lleshaj.
Ai sjell si shembull edhe dorëheqjen e tij nga posti i ministrit të Brendshëm në vitin 2020, duke thënë se me kalimin e kohës është bindur edhe më shumë se vendimi ishte i drejtë.
Lleshaj kritikon edhe mënyrën se si shteti po menaxhon protestat, veçanërisht përballjen e policisë me protestuesit.
“Detyra e policisë është garantimi i mbarëvajtes së protestave. Në të njëjtën kohë, ajo ka për detyrë që të përballet përherë më krimin dhe shkeljen e ligjit, gjithmonë bazuar në parimin e proporcialitetit dhe të vetëpërmbajtjes. Policia është e qytetarëve përpara se të jetë e shtetit”, deklaron ai.
