Ambasadorët e vendeve anëtare të BE-së, kanë zhvilluar këtë të mërkurë një takim në Tiranë me përfaqësues të Shqipërisë, ku në fokus ishin diskutimet mbi procesin e integrimit.
Në një postim në rrjete sociale, delegacioni i BE-së, shkruan se ambasadorët shkëmbyen mendime mbi ecurinë e negociatave të anëtarësimit ndërsa kanë rikujtuar si çështje urgjente luftën kundër korrupsionit dhe krimit të organizuar.
Sipas njoftimit, ambasadori i BE-së, Silvio Gonzato, ka theksuar se, për të arritur objektivin ambicioz të mbylljes së negociatave të anëtarësimit deri në vitin 2027, Shqipëria duhet të ruajë dhe përshpejtojë ritmin e reformave, duke garantuar njëkohësisht cilësinë e tyre gjatë gjithë procesit.
“Reformat që lidhen me integrimin në BE duhet të përgatiten mirë, të konsultohen gjerësisht me palët përkatëse dhe të zbatohen në mënyrë efektive, për të sjellë përfitime konkrete në jetën e përditshme të qytetarëve. Dialogu me vendet anëtare të BE-së është gjithashtu thelbësor në kuadër të negociatave për anëtarësim në Bashkimin Europian”, thuhet në deklaratë.
