Mirel Mërtiri, i shpallur në kërkim ndërkombëtar me urdhër të SPAK, për aferën e inceneratorëve, i ka cilësuar hetimet si të munguara dhe të cunguara.
Në një intervistë me “Skype” për Syri Tv, Mërtiri tha se “si është e mundur që në legjislacionin shqiptar nuk gjendet “pronar de facto”, nuk e parashikon ligji këtë term”.
“Unë dhe familja ime akuzohemi për akte të pakryera. Për inceneratorin e Elbasanit, familja ime është pronare e përkohshme. Shoqëria Albtech është një shoqëri që duhej të ekzsitonte në pronësi të familjes sime për 7 vjet. Në përfundim të vitit të 7-të, shoqëria i kalonte në administrim Ministrisë së Energjitikës dhe më pas Bashkisë Elbasan”, tha Mërtiri.
I pyetur nga Belind Këlliçi nëse ka pasur njohje apo takim me Sekretarin e Përgjithshëm të Këshillit të Ministrave, Engjëll; Agaçi, Mërtiri tha se nuk do të kalonte në emra të përveçëm, por pohoi se në ambientin shqiptar, është e pamundur për të mos pasur kontakte apo njohje me politikanët.
“Nuk është korrekte kur ka hetime të devijuara nga brenda SPAK, të përmend emra të përveçëm. Me zotin Agaçin nuk kam as njohje, as nuk e kam takuar ndonjëherë në jetën time dhe as nuk e di me çfarë të merrem”, tha Mërtiri.
